Алай йисан 1-августдиз Дагъустандин здравоохраненидин министр Жамалудин Гьажиибрагьимова  Дальневосточный федеральный округдин кьилин фтизиатр,  Забайкальский крайдин фтизиопульмонологиядин центрадин директор Павел Фадеевахъ галаз республикада фтизиатриядин къуллугъ вилик тухунин месэлаяр веревирдна. Дагъустандин здравоохраненидин министерстводин сайтда хабар ганвайвал, фтизиатриядин хиляй  уьлкведа машгьур пешекаррикай сад тир П.Фадеев чи республикада мугьманвиле авай.

Жигеррин чахуткадин четин жуьрейрик азарлу тир инсанар сагъарун патал Дагъустандин духтуррин тежрибада алай аямдин цIийи къайдадикай — бронхоблокациядин клапан эцигуникай — гегьеншдаказ менфят къачуникайни  рахана. Дагъустандин здравоохраненидин министр Ж.Гьажиибрагьимован гафаралди, и жуьредин къайдадикай республикада менфят къачузва, амма и операцийрин кьадар артухарна кIанзава. Кьве падни алай йисан октябрдиз Буйнакск шегьерда кардик квай чахуткадиз акси диспансерда и жигьетдай чирвилер гудай семинар кьиле тухун икьрар хьанва. Республикадиз теклифнавай пешекарри Дагъустанда зегьмет чIугвазвай чпин кIвалахдин рекьяй юлдашриз чахуткадин залан жуьреяр сагъаруникай лекцияр кIелда, мастер-классар кьиле тухуда. Павел Фадеева вичини тежриба хкаждай операцияр къалурун хиве кьунва. Вичин нубатдай яз  Жамалудин Гьажиибрагьимова и жуьредин серенжемрихъ духтурар патал еке важиблувал авайди, семинарди Дагъустандин духтурриз чахуткадин залан жуьреяр сагъарунин рекьяй уьлкведин хъсанбурукай сад тир медицинадин идарадин пешекаррин тежрибадикай менфят къачудай мумкинвал гудайди къейдна.

Гуьруьшдал фендигар азардин вилик пад кьуникайни рахана­. Къенин юкъуз и жигьетдай виридалайни нетижалу къайда флюорография я. Алай йисан сифтегьан 6 вацра Дагъустанда 667 агъзурдалай виниз инсанри и къайдадикай менфят къачуна, чпин сагъламвал ахтармишнава. Абурукай 360-далай виниз инсанрик чахутка квайди сифте яз дуьздал акъудна.

Рагнеда Рамалданова