“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, республикада балугъчивилин промышленностдал чан хкунин кIвалахар йигин еришралди кьиле физва. Кьилди къачуртIа, Дагъларин уьлкведа балугъар гьялдай махсус завод эцигдайвал я.
Мукьвара Махачкъалада балугъчивилин месэлайрай кьиле фейи совещанидал Дагъустандин тIебиатдин ресурсрин ва экологиядин министр Набиюла Къарачаева къейд авурвал, завод эцигдай чка вири патарихъай ахтармишнава. ЦIийи карханада алай аямдин виниз тир технологийрикай менфят къачуда. И карди хъсан еридин суьрсет гьасилдай мумкинвал гуда.
Регионда балугъчивилин хел вилик тухун патал гьуьляй кьазвай балугърин кьадар артухардайвал я.
“Чаз гьуьляй кьазвай балугърин кьадар артухариз ва абур чкадал, республикада, гьялиз кIанзава”, — лагьана Краснодардин крайдин балугъар кьадай ва гьялдай карханайрин Ассоциациядин председатель Юрий Атанова. Ада гьакIни хабар гайивал, 1-августдиз Каспий гьуьлуьз балугъар кьадай кьве гими рекье тунва.
Н.Къарачаеван фикирдалди, республикада балугъчивилин хел вилик тухун кIезрияр кьунилай ва гьялунилай гатIунун герек я.
“Дагъустанда кIезрияр гзаф кьадар ава — 450 тонндив агакьна. Россиядин мулкарал кIезрийрин икьван кьадар мад санани гьалтдач. Илимдин ахтармишунри къалурзавайвал, кIезрийрин тум хкат тавун патал йисан къене 90 тонндив агакьна кIезрияр кьуртIа жеда. Алатай йисуз, мисал яз, Каспий гьуьляй 1,2 агъзур тонндив агакьна кIезрияр кьунва. Кьиле тухвай ахтармишунри къалурзавайвал, Махачкъаладин ва Дербентдин арада авай ятара кIезрийрин кьадар иллаки гзаф я”, — лагьана министрди.
РД-дин Гьукуматдин Председатель Артем Здунова республикадин меркезда балугърин махсус базар арадал гъун теклифна. Премьер-министрдин фикирдалди, ихьтин чка Дагъустандиз къвезвай туристризни итижлу жеда.
Чи мухбир
