6-августдиз Докъузпара райондин Къаракуьре хуьре Дагъустан республикада авай Россиядин ФСБ-дин сергьят хуьнин управленидин векилринни хуьруьнвийрин собрание кьиле фена.

Ана «Докъузпара район» МР-дин кьилин везифаяр вахтуналди тамамарзавай Агьмед Агьмедова, хуьруьн администрациядин кьил Гьасанбег Балабегова, райондин УСХ-дин начальник Аким Гьажиева ва масабуру иштиракна.

Собранидал Къаракуьре хуьруьн сергьятдин зонадик акатзавай мулкара – гатун вахтунда гьайванар хуьдай яйлахда – хуьруьн майишатдин кIвалахар кьиле тухуниз талукь месэладиз килигна.

Сергьятдин къуллугъдин векилри малумарайвал, РФ-дин ФСБ-дин РД-дин Ахцегь районда авай сергьят хуьнин управленидин руководителди и йикъара Азербайжан республикадин сергьятдин къуллугъдин векилрихъ галаз санал гуьруьш тешкилна. Анал хуьруьн агьалийри сергьятдин зонадик акатзавай мулкара хуьруьн майишатдин кIвалахар кьиле тухунихъ галаз алакъалу важиблу месэлаяр къарагъарна ва веревирдна.

— РФ-дин ва Азербайжандин арада кутIуннавай международный икьрардал асаслу яз, кьве уьлкведин арада сергьят тайинарнава ва чавай дегишариз тежедай къайдаярни ава. Амма чна Азербайжандин терефдивай 2019-йисан эхирдалди чкадин халкьди сергьятдин патав гвай мулкара хуьруьн майишатдин кIвалахар кьиле тухунин гьакъиндай ихтиярар къачунва. Къаракуьре хуьрел ацалтзавай сергьятдин зонада гележегда агьалийри йисан гьи вахтунда хьайитIани малар хуьнин, векьер ягъунин месэладикай рахайтIа, ам чкадин агьалийрин хийирдиз жедайвал вини дережада гьялда, — къейдна сергьят хуьнин къуллугъдин векилри.

Малумарайвал, сергьятдин зонадиз гьахьдайла ва анай эхкъечIдайлани агьалийрив чеб вужар ятIа тестикьарзавай документар хьун чарасуз я.

«Лезги газет»