Къулай макъам вилив хуьзва

Политолог Виктор Небоженкоди “Facebook” соцсетда Украинадин президентдин кьилин душманриз талукь къейд кхьена. Адан гафарай, гьукуматдин кьилихъ галаз женг чIугвазвай ксар виликан президент П.Порошенко ва “Оппозициядин майдан — уьмуьр патал” партиядин политсоветдин кьил Виктор Медведчук я. Небоженкоди къейд авурвал, сиясатчийриз гьакъикъи гьукум Зеленскийдин ихтиярда тваз кIанзавач, “ягъун кьун” патал абуру къулай дуьшуьш вилив хуьзва.

Политологдин фикирдалди, Порошенкодихъни Медведчукахъ еке мумкинвилер ва мягькем далу ава. “Порошенкоди Украинадин милли консерватизмдин терефдай президентдиз аксивалда, адан кIвалахдилай наразивал къалурда. Медведчука лагьайтIа, Россияди куьмек гузвай Украинадин кьиблединни-рагъакIидай патан жемиятдин терефдай аксивал малумарда”, — лагьана ада.

Небоженкоди гьисабзавайвал, Зеленскийди вич патални, Украина патални хаталувилин дережаяр аннамишзавач. Апрелдин вацра Россиядин президентдихъ галаз авай рафтарвилерикай ихтилатдайла, Зеленскийди Россиядин регьбер вичин душман я лагьана малумарнай.

Мидявалдай себебар авач

США-диз Россиядихъ галаз мидявалдай себебар авач. “Новости” РИА-ди хабар гузвайвал, идан гьакъиндай Америкадин президент Д.Трампа малумарна.

“Чун Россиядихъ галаз рекье фин тийидай са себебни авач. Чун муькуь уьлквейрихъ галазни рекье фин тийидай себебар авач”, — лагьана Америкадин регьберди.

Трампан гафарай, уьлквейрин алакъайриз США-дин махсус прокурор Роберт Мюллера 2016-йисан президентдин сечкийрик гуя Россия къаришмиш хьуниз талукь яз кьиле тухвай ахтармишунрин кIвалахди пис таъсирна.

Мюллеран докладдал асаслу яз, Америкадин сечкийрин гьерекатрик гуя Москва къаришмиш хьанва. Идалай вилик Трампа США-ди Россиядихъ галаз санал кIвалахун чарасуз тирдакай малумарнай. Трампан гафарай, Россиядин терефдихъ галаз кIвалахар кьиле тухун гзаф четин я, амма, адахъ ядерный къуватар авайвиляй, крар кьилиз акъудун герек я.

200 мирг гиликьна

Мукьвара алимри кашакди гиликьнавай кеферпатан миргерин 200 жендек дуьздал акъудна. Идакай “Новости” РИА-ди хабар гузва.

Миргер терг хьунин делил Шпицберген архипелагда гьавадин шартIар дегиш хьунихъ галаз алакъалу авунва. Норвегиядин полярный институтди раижнавайвал, архипелагда икьван миргер санал сифте яз къирмиш хьанва.

“Кеферпатан миргер кьинин себеб гьавадин шартIар дегиш хьунин нетижада недай затI бес тахьун я. Каш финикди гзаф миргер кьейи дуьшуьш икьван чIавалди садрани хьайиди туш”, — кхьенва чешмеди.

Къейдзавайвал, хъуьтIуьн вахтунда чимивилер хьайидалай кьулухъ гьайванриз недай затIарин кьадар тIимил хьана. Ахтармишунрин институтдин пуд алимди цIуд гьафтедин къене Шпицберген архипелагда арадал атанвай­ гьалар ахтармишна.

Гуьруьш кьиле фида

Франциядин президент Э. Макрона 19-августдиз Россиядин президент В.Путин Франциядин Брегансонда кьабулда. Идан гьакъиндай “Ie Figaro” чешмеди хабар гузва.

Макронан гафарай, форт Брегансон кIвалах патал къулай чка я. Ина международный дережадин телефонрин рахунар кьиле тухуз ва къецепатан уьлквейрин регьберар кьабулиз жеда. Францияда Путинанни Макронан  гуьруьш кьиле фидайди Кремлдини тестикьарнава.

Идалай вилик Макрона, Россиядин регьбердихъ галаз телефондай рахай вахтунда, ЧIехи Гъалибвилин 75 йисан юбилейдин суварик иштиракун патал вич Москвадиз къведайдакай хабар ганай. Кьве терефди Ирандин ядерный программадихъ, Сириядин гьалар пайгардик кутунихъ галаз алакъалу месэлаярни веревирдна. Идалайни гъейри, президентри санал кIвалах кьиле тухуз гьазур тирдакай малумарна.

Алакъаяр чIур хьуниз акси я

Гуржистандин Батуми шегьерда Россиядихъ галаз авай рафтарвилер хъсан хъувуниз талукь митинг кьиле фена. Идакай “Новости” РИА-ди хабар гузва.

“Гуржистандин ватанпересрин кIватIал” оппозициядин партияди тешкилнавай серенжемдин иштиракчийри уьлкведин руководстводивай Москвадин адресдиз дявекарвилин келимаяр лугьуникай къерех хьун истемишна. “Чи уьлкведин кьиле авайбуруз халкьдиз вуч кIанзаватIа, гьадакай хабар хьурай. Чи кьилин истемишун гьа им я. Чна Сухумидихъ­, Цхинвалидихъ ва Москвадихъ галаз ачух суьгьбетар кьиле тухун лазим я”, — малумарна партиядин регьбер Ирма Инашвилиди.

“Гуржистандин ватанпересрин кIватIал» партиядин депутат А.Маршанияди арадал атанвай четин месэлайрин гьакъиндай Россиядихъ, Абхазиядихъ ва Кьиблепатан Осетиядихъ галаз гегьенш суьгьбетар кьиле тухуниз эвер гана. “Чун гьикьван чIавалди икI жеда? Чна вуж ва я вуч вилив хуьзва?”, — хабар кьуна дишегьли депутатди.

ТАСС-дин делилралди, Батумида кьиле фейи митингдал цIуд агъзурралди иинсанар кIватI хьанвай. Амма, гьава зегьемди хьуниз килигна, ам зур сятда кьван давам хьана.

Къейд ийин, Россиядинни Гуржистандин арада рафтарвилер июндин­ вацра Тифлисда кьиле фейи аксивилерин серенжемрихъ галаз алакъа­лу яз чIур хьана. 23-июлдиз Госдумадин спикер В.Володина Гуржистан­дин президент Саломе Зурабишвилидиз Россиядин вилик ба­гъиш­ла­мишунин гафар лугьуниз эвер гана.

Гьазурайди — Куругъли Ферзалиев