Са сеферда имам Абу Гьанифади тарс тухузвай чIавуз мискIиндиз са инсан атана ва метягьар гвай адан (яни имамдин) карвандал гьужумнавайдакай, ам шегьердив агакь тавурдакай хабар гана. Амма имамди, кьил агъузна, “шукур хьурай Аллагь­диз” лагьана, тарс давамарна. Атанвайда эменни чуьнуьхнавайдакай хабар ганатIани, имамдик са къалабулухни акатнач. Хабар гваз атайди элкъвена хъфена.

Са кьадар вахт арадай фейила, гьа и кас мад мискIиндиз атана ва вич гъалатI хьайидакай, имамдиз карван саламатдиз шегьердив агакьнавайдакай лагьана. Абу Гьанифади и сефердани, “шукур хьурай Аллагьдиз” гафарилай гъейри, мад са гафни сивяй акъуднач.

И кардал мягьтел хьайи сухтайри чпин муаллимдивай хабар кьуна:

— Я муаллим, куьн а инсанди гайи хабардив акьван секиндиз гьикI эгечIна?

Абу Гьанифади икI лагьана:

— Заз зи вири девлетар чуьнуьхнавайдакай, мад захъ затIни амачирдакай хабар гайила, зун жуван ри­кIиз килигна. Ам архайин тир. Гьавиляй за Ал­лагь­диз шукур гъана. Гуьгъуьнлай гъалатI хьайиди­, зи мал-девлетни саламат тирди чир хьайила, зун мад жуван рикIиз килигна. И сефердани ам архайин­ тир. И дуьньядин мал-девлетда вил тахьунал за шадвална ва Аллагьдиз нубатдин сеферда шукур­ гъана.

Гьакъикъатдани, бязи инсанри, чун и дуьньядал­ мугьманар тирди рикIелай алудна, вири уьмуьр девлетар кIватIиз акъудзава. Гьейран жедай кар ам я хьи, пулар, девлетар гзаф жердавай иштя­гьарни артух жезва. Мад ва мад кIватIиз алахъ­за­ва. Нефсинин кьенерар тIарамдиз кьаз жезвай инсанар гьакъикъатдани бахтлубур я. Мумкинвал ав­а­тIа, Аллагьдин рекье харж ая. И дуьньядай эхират­диз девлетар гваз садни физвач.

* * *

Джадан хва Алиди хабар гайивал, са касди имам Абу Гьанифадиз агъзурдав агакьна кIвачин  къапар гана. Имамди савкьат кьабулна ва кIва­чин къапар алимринни вичин сухтайрин арада пайна.

Са кьвед-пуд югъ арадай фейила, имамдин хциз кIвачин къапар герек хьана. Маса къачудайвал, имам базардал физ кIвачин хьана. Рекье адал вичин виридалайни хъсан сухтайрикай сад тир Халид Самтиа Басридин хва Юсуф гьалтна. Ада хабар кьуна:

— Я муаллим, квез накь агъзурдав агакьна кIва­чин къапар пишкешнавай. Мад куьне кIвачин къапарикай вучзава?

Имамди жаваб хгана:

— Накь заз пишкеш авур вири кIвачин къапар за алимрин, сухтайрин, муаллимрин, игьтияж авайбу­рун арада пайна.

Гьазурайди — Агьмед Магьмудов