Выхухоль муьнуьгърин дестедик акатзавай, нек хъвадай гъвечIи гьайван я. Ам Урусатда ва Европадин бязи чкайра яшамиш жезва. Гзафни-гзаф Днепр, Волга, Дон ва Урал вацIарин цера дуьшуьш жеда. ГъвечIи вагьшидин бедендин яргъивал 18-22 сантиметр кьван жеда, заланвал – 520 грамм кьван. Адан тумунал крчарин кIарабдин хьтин хъуьруьшар ва векъи чIарар ала.
Выхухоль це хъсандиз сирнавдай гьайван я. Адан уьмуьрдин саки са пай це акъатзава. Йисан гзаф вахтунда абур экъечIдай са чка авай тIеквенра яшамиш жезва. А тIеквенни, адет яз, цин кIане жезва. Гатун вахтунда кьилди яшамиш хьайитIани, хъуьтIуьз абур 12-13 санал тIеквенра яшамиш жеда. Чилел абурувай зирингдиз чукуриз жезвач, гьавиляй абур гьасятда маса гьайванрин сарарик акатун мумкин я. ТIебиатда и вагьшияр 4 йисуз кьван яшамиш жезва.
Выхухоль тIуьнал гзаф рикI алай гьайван я, са суткадин къене адавай вичин бедендин заланвилиз барабар кьадар ем нез жеда. Гатун вахтунда ада бязи пепеяр, зилияр, шкьуьнтар ва маса затIар неда. ХъуьтIуьн вахтунда жуьреба-жуьре набататарни, гьатта кIезриярни тIуьниз ишлемишда.
Гьазурайди — Куругъли Ферзалиев
