Алатай гьафтедин жуьмядин югъ дагъустанвияр патал суваринди хьана. Дагъларин уьлкведин агьалийри Дагъустандин Конституциядин югъ шад гьалара къейдна. Саки вири шегьерра, районрин центрайра, чIехи хуьрера Конституциядин йикъаз талукьарнавай шад мярекатар кьиле фена.
ИкI, Дербент шегьерда гуьрчег чкайрикай сад тир гьуьлуьн къерехда тIвар-ван авай артистри, эстрададин гъетери, фольклордин, кьуьлерин ансамблри, музыкальный школайра ва колледжда кIелзавайбуру еке концерт гана. И юкъуз шегьердин культурадин, спортдин, жегьилрин сиясатдин ва туризмдин рекьяй управленидин къуллугъчийри хейлин агьалийриз «Дагъустандин Конституция» брошюраяр багъишна.
Избербаш шегьердин культурадин дворецда гьевескар художникрин межрегиональный “Бажарагълубурун дуьнья” выставка ва гьакI конкурсар, фестивалар кьиле фена.
Хасавюрт райондин культурадин идарайра Дагъустандин Конституциядиз бахшнавай ктабрин, шикилрин выставкаяр тешкилнавай. Къизляр районда, суварин йикъаз талукьарна, волейболдай турнир кьиле тухвана.
Гьелбетда, кьилин мярекат Дагъларин уьлкведин меркезда, Дуствилин кIвале кьиле фена. Ана РД-дин Кьил Владимир Васильева, РД-дин Халкьдин Собранидин депутатри, РД-дин Гьукуматдин Председателдин Сад лагьай заместитель Анатолий Къарибова, бязи министерствойрин, ведомствойрин, вузрин регьберри, халкьдин майишатдин, образованидин, культурадин, искусстводин, прессадин векилри иштиракна.
КIватI хьанвайбурухъ элкъвена, В.Васильева лагьана:
— Республика патал къенин югъ пара важиблуди я — 2003-йисан 26-июлдиз Дагъустандин дибдин закон тайинарнай. Вахт пара четинди тир. Ам гьазурайбурун рикIел лап хъсандиз алама, республикада арадал атанвай чIуру гьаларин вилик пад кьунин карда Конституциядин къуват артухди хьана. Ада республикадин ва халкьдин садвал хуьниз куьмекна, демократвилин обществодин бинеяр мягькемарна. Агьалийриз ихтиярар, азадвилер гана. Конституциядин къиметлу законрал, ерийрал алай девирда чнани амалзава. Гьа са вахтунда чаз агьалийрин патайни гъавурда акьун, ихтибар, къени, хийирлу крарик шерик хьун кIанзава.
Чи кIвалахар квез аквазва. Чна агьалияр дарманралди таъминарунин, медикосанэкспертизадин хилера къайда твазва, бюджетдин пулар менфятсуздаказ ишлемишунихъ галаз женг чIугвазва, республикадин бюджетдиз налогрин гзаф пулар къведайвал кIвалах тешкилзава. Дагъустанвийри истемишзавайвал, чна коррупциядихъ галаз гафаралди ваъ, краралди женг чIугвазва. И серенжемри хъсан нетижаярни арадал гъизва. Бюджетдиз алава яз къвезвай пулар чна яшайишдин кар алай месэлаяр гьялуниз харжзава.
Къенин югъ чун патал лишанлуди я, — давамарна РД-дин Кьили. — ГьакI хьайила, и югъ мадни рикIел аламукьдайвал, чна чи баркаллу хейлин рухвайривни рушарив государстводин наградаярни вахкуда.
Гьа икI, В. Васильева Вини Убекимахи хуьруьн администрациядин кьил Рабадан Рабадановаз гайи (кьейидалай кьулухъ) Жуьрэтлувилин орден адан стхадив вахкана. РД-дин Гьукуматдин Председателдин Сад лагьай заместитель Гьажимегьамед Гьуьсейнов — “Ватандин вилик лайихлувилерай” I дережадин, “Афгъанистандин ветеранрин Дагъустандин союз” организациядин председатель Нажмудин Акаев, “Афгъанистандин ветеранрин Махачкъала шегьердин совет” организациядин председатель Алисултан Алисултанов “Ватандин вилик лайихлувилерай” II дережадин орден-медалралди къейдна.
Къизилюрт районда террористриз акси серенжем тухудайла, викIегьвал къалурай ва телеф хьайи Россиядин МВД-дин 604-центрадин махсус бригададин старший стрелок Павел Горбатовскийдиз гайи “Дагъустан Республикадин вилик лайихлувилерай” орден кьегьалдин диде Наталья Горбатовскаядив вахкана.
Конституциядин суварин югъ мадни хейлин инсанрин рикIел аламукьда. Обществодин, образованидин, культурадин, искусстводин ва маса хилерин векилар РФ-дин, РД-дин лайихлу тIвараралди, медалралди, гьуьрметдин грамотайралди, хурудал алкIурдай знакралди къейдна.
Гьа и юкъуз В. Васильева Дагъустан Республикадин государственный ва кьве йисалай са сеферда гузвай Расул Гьамзатован тIварунихъ галай премияр вахкудай шад мярекатдани иштиракна.
Республикадин госпремияр литературада, публицистикада, музыкальный искусствода, концертар кьиле тухунин кIвалахдай, декоративно-прикладной, театрдин искусствойра, кинода, тIебии, общественный ва технический илимра агалкьунралди ва яргъал йисара зегьмет чIугвазвай пешекаррив вахкана.
— Ина, чпин везифаяр пешекарвилелди кьилиз акъудуналди, гьакъисагъвилелди зегьмет чIугуналди Ватандиз къуллугъзавай, республика авайдалай гуьрчегарзавай, Россиядин гзаф халкьарикай ибарат культурадин ва искусстводин агалкьунрик чпин пай кутазвай инсанар ава. Къе госпремиядиз лайихлу хьанвай гьар сад чи республикадин дамах, миллетдин къизилдин фонд арадал гъизвай баркаллу рухваярни рушар я. Куь алакьунар, агалкьунар масадбурузни хъсан чешне я, — къейдна В.Васильева. Конституцияди гьар садаз гьар жуьредин ихтиярар ганва ва къе абурукай гьикI менфят къачузватIа чаз Дагъустандин лап хъсан векилри къалурна. Баркалла квез!
Госпремияр къачурбурун тIварунихъай заргар Къурбанали Мегьамедова ва технолог-алим Амият Демировади РД-дин Кьил Владимир Васильеваз сагърай лагьана.
Нариман Ибрагьимов
