Дербентда, иллаки гатун вахтунда агьалийри ва шегьердин мугьманри хъсандаказ ял ягъун патал жуьреба-жуьре мярекатар кьиле тухузва ва и барадай цIийи мумкинвилер жагъурзава. Шегьердин гьуьлуьн кьере тешкилиз башламишнавай махсус концертарни дербентвийри ва къадим шегьердин мугьманрини туристри гзаф хушвилелди кьабулна.
Гьафтеда кьведра — киш ва гьяд йикъарин нянрихъ кьиле тухузвай ихьтин концертра лезги, азербайжан, урус, табасаран, агъул ва маса миллетрин векилар тир манидарри чпин бажарагълувилер къалурзава, инсанар шадарзава.
Къейдна кIанда хьи, гьуьлуьн кьере гьакъисуз шад мярекатар тешкилуник кьил кутунвайди мергьяматлу кас, карчи Руслан Рамазанов я. Концертрихъ галаз сад хьиз ада ва маса активистри гьуьлуьн кьере халкьдин яратмишунрин (хъенчIин къапарин, гамар хрунин ва маса жуьрейрин шейэрин) выставкаярни тешкилзава.
Гьуьлуьн кьере кьиле тухузвай концертрикай ва выставкайрикай сада иштирак авур шегьердин кьил Хизри Абакарова мярекатрин тешкилатчийриз гзаф сагърай лагьана ва шегьерда агьалийри чпин азад вахтунда хийирлудаказ ял ягъун генани хъсан жедайдак умуд кутуна.
Нариман Къарибов
