26-28-июлдиз Минскда грекринни римлуйрин жуьреда кьуршахар кьунай Олимпиададин чемпион Олег Караев рикIел хкуниз талукьарнавай международный турнир кьиле фена. Акъажунра Белоруссиядин хкягъай командадик кваз вичин ери-бине Хасавюрт райондин Къурушрин хуьряй тир Радик Къулиевани иштиракна.
Ярумчух финалда кьиле фейи бягьсина къурушви гьасиррал Урусатдин векилдихъ галаз экъечIна. Женг кьиле физвай чIавуз Радикан рацIамдал, вичихъ галаз къуватар алцумзавайдан кьиле акьуна, еке кьацI (хер) хьана. Садлагьана вил дакIуна. Амма и карди чи ватанэгьлиди гъалибвал къачуниз манийвал ганач.
Бягьсинилай кьулухъ командадин духтурри ва тренерри Радик Къулиеваз, хьанвай хасаратвал себеб яз, финалдин акъажунра иштирак тавун теклифна. Амма рикIе гъалиб жедай къаст авай лезгиди абурун теклиф кьабулнач.
— Финалда зун Туьркиядин векил Догон Гоктасахъ галаз гуьруьшмиш жезвай. За жувавай адан винел гъалибвал къачуз жедайди гьиссзавай, — рикIин сирер ачухна спортсменди журналистрихъ галаз кьиле фейи суьгьбетда. — Авайвал лагьайтIа, бягьс четинди хьана. Эвел кьиляй 2:0 гьисабдалди зун кумукьзавай. Амма рикIевай къастуни заз къуватар гана… Зун гъалиб хьана.
Международный турнирдин къизилдин сагьиб Радик Къулиев алай вахтунда дуьньядин чемпионатдиз гьазур жезва.
Чи мухбир
