“Лезги газетдин” алатай нумрада чна лезгийрин 28 йис хьанвай машгьур боксер Максим Дадашев Америкада кьиле фейи бягьсинилай кьулухъ, кьилин мефтIедиз хьайи хасаратвилер себеб яз, рагьметдиз фейидакай хабар ганай.

США-дин “NBC” телеканалди хабар гайивал, Дадашевахъ галаз бягьсина иштиракай Пуэрто-Рикодай тир Субриэл Матиаса акъажунра гъалиб хьунай вичиз гузвай пул къачунач.

“Заз а пул герек туш”, — лагьана Матиа­са­. Къейд ийин хьи, адан гонорарди 75 агъ­зур­ доллар (саки 5 миллион манат пул) тешкилзавай. “Максим рагьметдиз фена лагьай хабардикди заз гзаф пис хьана. Гьич са касни­ мурадар, макьсадар патал рекьиз­ гьазур туш. Чун гьасиррал хизанар хуьн па­тал экъечIзава. Бязи дуьшуьшра, гьа­йиф­ хьи, чна и кIвалах гьикьван четинди ятIа кьатIуз­вач. Кьакьанра лув це, чIехи ас­кер. Хьанвай кардин гьакъикъат анжах Аллагьдиз чида. Ваз зи патай гьамиша гьуьрмет жеда. Архайиндиз ксус, Максим Дадашев”, — лагьана Субриэл Матиаса “BoxingScene” чешмедиз гайи интервьюда.

Къейд ийин хьи, Максим Дадашев Санкт-Петербургда кучукда. Адахъ са хва ава.

Агьмед Магьмудов