Мукьвара Каспийск шегьердин депутатрин собранидин председатель Абдулвагьид Жаватова ММА-дай пуд сеферда — Урусатдин, пуд сеферда дуьньядин чемпион Руслан Сатиев тебрикна.
“Лезги газетдиз” Каспийск шегьердин администрациядин пресс-къуллугъди хабар гайивал, А.Жаватова Сатиев кьетIен алакьунар, еке гележег авай спортсмен яз гьисабзава.
“Зи фикирдалди, им хъсан нетижа я. Чаз малум тирвал, Урусатда ММА-дай акъажунриз экъечIзавайбурун арада викIегь спортсменар гзаф ава. Ихьтин гьалара галаз-галаз пуд сеферда гъалиб хьун регьят кар туш”, — лагьана А.Жаватова жегьил пагьливандихъ галаз кьиле фейи гуьруьшда.
Эхиримжи сеферда дуьньядин дережа муьтIуьгъарай чIавуз Русланан 19 йис тир. Алатай йисуз Бахрейнда кьиле фейи дуьньядин чемпионатда 52 уьлкведай атанвай вишералди спортсменри иштиракзавай. Чи ватанэгьли 57 кг-дин заланвал авайбурун арада виридалайни викIегь хьана. Ам Ватандиз дуьньядин чемпионатдин нубатдин къизил гваз хтана.
Къейд ийин хьи, Руслан Сатиев Мегьарамдхуьруьн райондин ЦIелегуьнрин хуьряй я. Спортдин рекье сифтегьан чирвилер Дербентда къачуна. Гуьгъуьнлай Каспийскда азаддиз кьуршахар кьунал, боксдал машгъул хьана. Спортдин рекьяй мадни вилик фин патал ам Москвадиз куьч хьанва.
Гуьруьшдин вахтунда Абдулвагьид Жаватова жегьил чемпиондиз гапур, бармак, пулдин пишкеш гана, Руслан Сатиевахъ гележегда спортдин рекье мадни кьакьан кукIушар муьтIуьгъардай мумкинвилер хьун алхишна.
«Лезги газет»
