Кьурагь райондин администрацияда, РД-дин милли политикадин ва динрин крарин рекьяй министерстводи, “Дагъустандин дишегьлийрин союз” ДРОО-ди ва “Кьурагь район” муниципалитетди тешкилуналди, 1999-йисуз Дагъустандиз гьахьай международный бандитрин тешкилатар кукIварайдалай инихъ 20 йис тамам хьуниз талукьарнавай дишегьлийрин форум кьиле тухвана.

Мярекатда Дербент ва Дагъустандин Огни шегьеррайни 12 райондай атанвай дишегьлийрин делегацийри иштиракна. КIватI хьанвайбурухъ элкъвена, “Кьурагь район” муниципальный райондин кьил Замир Азизов рахана:

— Гьуьрметлу мугьманар! Форумдин иш­тиракчияр! За куьн чи  Кьурагьрин чилел хушвилелди къаршиламишзава. Сагърай куьн а женгера телеф хьайи кьегьал рухваяр рикIел хкунай. Чи райондайни, гьа цIаяр, тIурфанар себеб яз, чандивай, кIваливай-йикъавай хьайи ксар гзаф хьана. Абурукай сад чи ватанэгьли, милициядин капитан Султанов Закир Куругълиевич я. Ада а женгера кьегьалвал, дирибашвал къалурна. Террористри яна кьейи, вичиз Россиядин Феде­рациядин  Игитвилин  тIвар  гайи  КIири­йрин хуьряй тир мешебеги Батманов ­Зейнудин Лукьмановича террористрин гъиляй жегьил хизан ахкъудна, къутармишна. Ихьтин кьегьалар чахъ гзаф ава. Им игитрин чил я ла­гьайтIа, зун гъалатI жедач.

РД-дин милли политикадин ва динрин крарин рекьяй министр Энрик Муслимова райондин агьалийрин рикIел 1999-йисуз Дагъустанда кьиле фейи вакъиаяр, Ансалта, Рахата, Чабан-Махи, Къара-Махи хуьре­рал террористри авур гьужумар ва Россия­дин МВД-дин къенепатан кьушунрихъ галаз гуьгьуьллувилелди Дагъус­тан­дин мил­летар сад хьана арадиз атанвай батальонар дяведиз къарагъайди ва хайи Ватан террористрикай михьайди рикIел хкана­. И гафар тестикьардай “1999-йисан вакъиаяр” ва “Дагъустандин дишегьлийрин союздин 25 йис” кинофильмаярни къалурна.

Итимрихъ галаз дишегьлийрини хайи чил хвена. Абуру аскерриз,  рухвайриз фу чразвай, хуьрекар гьазурзавай, хирер хьанвай кьегьалриз куьмекар гузвай.

Дишегьлийрин кьегьалвиликай, дирибашвиликай инал рахай “Дагъустандин дишегьлийрин союз” ДРОО-дин пред­седатель Инти­зар Мамутаевади лагьана. Ада шаир, публицист Фазу Алие­вадин “Гьиниз гуьлле гайи­тIани, ам ди­де­дин ри­кIихъ галукьзава” гафар тикрарна. Эхь, дидеяр веле­дар патал яшамиш жезва. Да­гъустандин гележег чи аялар я. Ихьтин мя­­река­тар­ кьиле тухунин кьилин макьсад акьалт­завай несилдиз чи баркаллу тарих чирун, абур ва­тан­пе­ресар яз тер­бияла­мишун я.

Форумдин важиб­лувикай Кьурагь райондин хуьрерихъ галаз кIва­лах тухунин рекьяй уполномоченный Эльмира Исаева, Дербентдин дишегьлийрин советдин председатель Ва­ле­рия Хасанова, Вирироссиядин Халкьдин фронтдин член Наида Наврузбегова, РД-дин Муфти­йдин заместитель Агьмад гьажи Къагьаев, РФ-дин Игит Зейнудин Батманован хендеда Жамиля Батманова, Закир Султа­нован руш Гуьлжамал Султанова, Дербент ше­гьер­дин культурадин управленидин начальник Гуьлпери Шабанова ва масабур рахана.

Дагъустан Республикада ислягьвал, сад­вал мягькемарунин ва гражданвилин общество вилик тухунин кардик пай кутунай В.Хасановадиз, Ж.Батмановадиз, Г.Султановадиз, А.Кьасумовадиз, Ф.Мегьамедовадиз, Э.Исаевадиз, С.Исмаиловадиз гьуьрметдин грамотаяр, медалар гана.

Маида Агьмедова