Урусатдин гьукуматди Дагъустандин больницайриз цIийи тадаракар маса къачун патал федеральный бюджетдин резервдин фондунай 240 миллион манат пул чара авунва. РД-дин здравоохраненидин министерстводин пресс-къуллугъди хабар гузвайвал, и такьатрихъ мультиспиральный компьютеррин 5 томограф маса къачуда.
РикIел хкин, алатай йисан июндин вацра республикадин Кьил Владимир Васильева Президент Владимир Путинахъ галаз кьиле фейи гуьруьшдал Дагъустандин больницаяр патал компьютеррин 4 томограф маса къачунин карда куьмек гун тIалабнай. Президентди а вахтунда вичин разивал къалурнай.
Медицинадин цIийи тадаракар гьи больницайрив агакьдатIа, РД-дин здравоохраненидин министр Жамалудин Гьажиибрагьимова лагьана. Адан гафаралди, томографар республикадин травматологиядинни ортопедиядин, диагнозрин центрайриз, Каспийск шегьердин больницадиз, Буйнакскдин верем азардиз акси диспансердиз ва Ботлих райондин кьилин больницадиз рекье твада. Ботлих райондив агакьдай томографдикай ЦIунти, ЦIумада, Ахвах ва Гумбет районрин агьалийривайни менфят къачуз жеда.
“Ихьтин дережадин тадаракар маса къачун республикадин здравоохраненидин хиле лишанлу вакъиа я. Милли “Сагъламвал” проект кьилиз акъудунин сергьятра аваз чна онкологиядин ва рикIинни дамаррин азарар сагъарунин рекьяйни алава серенжемар кьабулуниз кьетIен фикир гуда”, — лагьана Жамалудин Гьажиибрагьимова.
Къейд ийин хьи, цIийи жуьредин томографрин мумкинвилер екебур я. Абурун куьмекдалди инсандин беденда кьиле физвай патологиядин лап гъвечIи дегишвилерни тайинариз жезва.
«Лезги газет»
