Са шумуд йис идалай вилик сагъламвал гуьнгуьна хутадай республикадин больницади (РБВЛ) вичин 50 йис къейднай. Махачкъалада Бейбутован тIварунихъ галай куьчеда 9-нумрадин дараматда авай идара сифте нубатда а кардалди тафаватлу я хьи, ина азарлуяр гьакъисуздаказ сагъар хъийизва. КIанзавайди анжах вун яшамиш жезвай чкадай направление хьун я.
И мукьвара Кьурагь райондин КIирийрин хуьруьн фельдшер Руслан Батманович Батмановахъ галаз санал чун и медидарадиз фена. Сифте нубатда сагъламвал гуьнгуьна хутадай идара туькIуьрнавай гьалди чи фикир желбна. Больницадин вири гьаятра азарлуйри ял ягъун патал къулай куьсруьяр эцигнава. Ина столовой, мискIин, фонтан кардик квай парк ава.
Гьаятра къекъвейдалай гуьгъуьниз чна РБВЛ-дин кьилин духтур Динара Ражабовна Ражабовадихъ галаз суьгьбетна. Адан гафарай малум хьайивал, ина азарлуйриз чарасуз лазим тир медицинадин вири жуьредин къуллугъар ийизва. Гьа гьисабдай яз, палчухдихъ галаз алакъалу серенжемар, сагъардай физкультура, душ, сирнав авун, физкабинетда лагьайтIа, — урологиядин, гинекологиядин, мануальный терапиядин ва гзаф маса къуллугъар. Начагъбуруз ина йикъа 4 сеферда, махсус диетадал аслу яз, тIуьнар гузва.
РБВЛ-да сагъар хъувунин курс кьиле тухузвайбуру ва сагъламвал къайдадиз хканвайбуру идарадин кIвалахдиз хъсан къимет гузва. Хейлинбур иниз чпиз менфят жезвайвиляй 5-6 сеферда хквезва.
Кьилин категория авай духтур-невролог Ламунат Агъамирзоевади къейдзавайвал, больница нетижалудаказ сагъар хъувун патал тайинарнавайди я. Чна игьтияж авай вирибуруз — чи региондин начагъ гражданрин гьал хъсанарун патал гьакъисуз еке куьмек гузва. Сагъар хъийидай серенжемар (процедураяр) кьиле тухвана куьтягь хьайидалай гуьгъуьниз саки 95 процент начагъбур кIвалериз хъсан хъхьана хъфизва.
Кьилин категория авай духтур Эльмира Ибрагьимовади лугьузвайвал, 80 процентдив агакьна азарлуяр РД-дин яргъал районрай атанвайбур я. И сагъар хъийидай идарадин кьетIенвал а кардикай ибарат я хьи, вири процедураяр гьакъисуз ийизва. Хъсанвилихъ рум гун — им идарадин духтуррин кьилин мурад я.
Гьакъикъатдани, чун винидихъ лагьанвай вири крарин шагьидар хьана. Больницадин дегьлизра ва паркуна, и медидарадин патарив гвай чкайра къекъведайла, чал сагъар хъувунин курс кьиле тухузвай азарлуяр дуьшуьш хьана. Абуру РБВЛ-дин къуллугъчийрин гьакъиндай анжах чими келимаяр лагьана. И карди чунни шадарна.
РБВЛ-дин неврологиядин отделенидин заведующий Светлана Жабраиловади ихтилатзавайвал, отделение начагъ 80 кас патал гьисаба кьунвайди хьунизни килиг тавуна, больницада чпин сагъламвал мягькемар хъийизвайбурун кьадар гзаф вахтара виш касдив агакьзава. И кардини, са шакни алачиз, РБВЛ гегьеншарна кIанзавайдан гьакъиндай лугьузва.
Лагьана кIанда хьи, РБВЛ буш чкадал арадал атайди туш. Адан кьулухъ дурумлу ва гьакъисагъ зегьметдин яргъал йисар гала. Больницади инсанрин сагъламвилин къуллугъда амукьун патал вири крара куьмек гайи ксаралди дамахзава. Идахъ галаз алакъалу яз Гьажи-Мурад Малаеван тIвар рикIел хкун тавуна жедач. Адан гьакъиндай суьгьбетдайла, Д.Ражабовади лагьана хьи, РБВЛ-да гьакъисагъвилелди кIвалахай гзаф йисара, Гь.Малаева кьил кутуналди, адан алахъунралди больницадин мулкар вижевайдаказ туькIуьрна, гьар са рекьяй виликди фена.
Амма больницадин дарамат исятда са акьван хъсан гьалда авач. Идалайни гъейри, начагъбурун кьадарни больницадивай кьабулиз жедайдалай гзаф я. Гьавиляй патав цIийи дарамат эцигун чарасуз я. Дагъустан Республикадин Гьукуматда, ФОМС-да и месэладиз килигда. Умудлу я хьи, чи региондин руководстводи и месэладиз фикир тагана тадач ва вири терефрихъай куьмек гуда.
Руслан Батмановахъ галаз суьгьбетдайла, чир хьайивал, амни и идарада къаткана. Ада лагьана хьи, сагъламвал гуьнгуьна хутадай республикадин больницада къаткай йикъалай духтурар адав лап хъсандиз эгечIна. Ада РБВЛ-дин вири къуллугъчийриз рикIин сидкьидай сагърай лугьузва”. Абурун гьакъисагъ зегьмет себеб яз, за жуван беден кьезил хьанвайди гьиссзава, азарди зун, виликрай хьиз, мукьвал-мукьвал бизарзамач”, — къейдзава ада.
— Зун сагъар хъувун патал зегьмет чIугур неврологиядин отделенидин бязи работникрин тIварар кьан: духтур-невролог Мегьамедова Хадижат, дежурный медсестра Патимат Гьажиева, старший медсестра Патимат Сулейманова, палатадин медсестраяр тир Лейла Рабадангьажиева, Рада Агъамирзоева ва масабур. Къуй абурухъ сагъламвал хьурай, дуьньядал алай кьван хъсанвилер гурай и къени ксариз.
“Лезги газетдин” редакциядини РБВЛ-дин къуллугъчийриз сагърай лугьузва, абурухъ гележегдани еке агалкьунар хьана кIанзава.
Мурад Саид, Урусатдин писателрин Союздин член
