Мегьарамдхуьруьн районда халкьдин яшайишдин дережа хкажунин макьсаддалди, «Шегьердин къулай шартIар тешкилун» проектдин сергьятра аваз, мулкар абадунин кIвалахар давам жезва. Идакай «Лезги газетдиз» райадминистрациядин пресс-къуллугъди хабар гузва.

Жемиятдин чкаяр хъсанарунин карда гзафни-гзаф агьалийри, жемиятдин тешкилатри иштиракзава. Алай йисуз райондин Оружба, Ярагъ-Къазмаяр ва Къуюстан хуьрерин ял ядай багълар аваданламишдайвал я. Чешмеди къейдзавайвал, жемиятдин мулкар хъсан ва къулай гьалдиз гъунин проектдик къведай йисуз муькуь хуьрерни кутадай фикир ава.

Идалай вилик райондин кьил Ф.Агьмедован теклифдалди 2018-2022-йисара кьилиз акъуддай муниципальный программайрин проектар арадал гъанай ва жемиятди веревирдун патал чкадин СМИ-дин такьатра чапнай. Алай вахтунда гъиле кьунвай крар кьилиз акъудун давам жезва. Ял ядай багъларин мулкара ватандашар патал вири жуьредин шартIар тешкилзава, гьа жергедай яз мумкинвилерал сергьят алайбурни фикирда кьунва.

Къейд ийин, объектрал кьиле физвай вири кIвалахар райондин кьил Фарид Агьмедова вичин гуьзчивилик кутунва.

«Лезги газет»