Мугьаммад пайгъамбар ﷺ  хайи йикъан гьуьрметдай 21-июлдиз Ахцегьа Булут бубад пIирел диндин чIехи межлис (ам ина гьар гатуз къурмишун адет хьанва) кьиле фена. Ам райондин имамрин советдин председатель, Ахцегьрин жуьмя-мис­кIин­дин имам Абдулашим гьажи ­Аб­д­улгьашумов кьилеваз тешкилна.

Диндин межлис дагъдин тIебиатдал ял ягъунилай, чай-фу дадмишунилай гатIунна. Хайируллагь гьажи Абасова ина, вичи кутунвай 5 гектардин гуьзел бегьерлу багъда, 200 касдив агакьна агьалияр кьабулна. Куьмекчиярни галаз жемятдиз пак булахдин цикай чаяр, шурваяр, ашар, дулмаяр гун гьадан тешкилатчивилин гьунар я. Сагърай вич!

— Гьуьрметлу мусурман стхаяр, вахар! — имамди межлис вяздин суьгьбетдилай башламишна. — Къе чун рагьметлу Булут бубадин зияратдал атанва. Жемятдихъ галаз санал хийирдин рекье хьун еке суваб я. Межлисдин кьилин везифайрикай сад жегьилриз диндин чирвилер гунихъ галаз санал абуруз чи бубайрин хъсан эдебар, хайи тIе­биат чирун, кIанарун ва хуьн я… Амма санлай девир, инсанар, гьайиф хьи, пис патахъ дегиш жезва. Ихьтин шартIара чун  гележегдин несилар патал эдеблувал, мергьяматлувал, адалатлувал хуьз алахъна кIанда… Къуй Аллагьди чун хъсан крарал уьтквем авурай, чи садакьаяр ва дуьаяр кьабулрай!..

Межлис, адет тирвал, Къу­ръ­­­андин аятар, насигьатрин суьгьбетрин арайра мавлидар, дуьаяр кIелуналди ва зикр авуналди давамарна.

Къейд ийин, жуьмя-мис­кIин­дин имам Абдулашим гьажи Аб­дулгьашумован регьбервилик кваз Ахцегьа 20-июлдиз, халкьдин иштираквал аваз, райцентрадин къуза патан сурарин цлар-жугъунар мягькемар хъувуна.

Дашдемир Шерифалиев