6-7-август. Бандитрин тешкилатри дагъларин районрин са шумуд хуьр кьуна. МВД-дин руководстводин ва РФ-дин Яракьлу Къуватрин Генеральный штабдин начальникдин къарардалди аниз МВД-дин къенепатан кьушунрин ва РФ-дин Яракьлу Къуватрин 136-мотострелковый кьилдин бригада рекье туна.

8-август. Махачкъаладиз Генеральный штабдин начальник, РФ-дин оборонадин министрдин сад лагьай заместитель, армиядин генерал Квашнин атана.

9-август. Ботлих районда боевикри танкариз аксивалдай ракетрай вертолетрин майдандиз гуьлле гана. Не­тижада са вертолетдин экипаждин членар, вертолетрин 487-полкунин командирдин заместитель, РФ-дин Игит, под­полковник Юрий Наумов ва летчик-штурман, старший лейтенант  Алик Гаязов телеф хьана.

10-август. РФ-дин Гьукуматдин Председатель Владимир Путинан регьбервилик кваз терроризмдиз аксивалдай Федеральный комиссиядин заседание хьана. Адан кIвалахда Оборонадин министерстводин, ФСБ-дин, МВД-дин ва маса  ведомствойрин регьберри иштиракна. Анал Кавказда, кьилди къачуртIа, Дагъустанда законар чIурза­вайди, терроризмди кьил хкажнавайди къейдна. Вакъиаяр­ хьайи райондиз Кеферпатан Кавказдин военный округдин­ армиядин командующий генерал-полковник Виктор Казан­цев атана.  Акьунар хьанвай зонадиз Махачкъаладай гуьгьуьллубурун интернациональный сад лагьай десте рекье­ гьатна. Дагъустандин военный комиссариатрин патарив резервистрин жергейрай комендантский ротаяр тешкилна.­

11-август. Танди хуьр азад авуниз талукь военный операция  башламиш хьана.

15-август.  Женгина батальондин командир, гвардия­дин майор Сергей Костин ва 4 десантник телеф хьана. Май­ор­диз РФ-дин Игитвилин тIвар ва вири де­­сант­никриз  къалурай кьегьалвиляйни игитвиляй женгинин орде­нарни медалар гунин гьакъиндай материалар гьазурна.

21-22-август. Федеральный армиядин  кьушунри Ботлих районда бандитар терг авун  давамарна. Авиацияди Рахата, Ансалта, Шодрода хуьрерин  бандитрин даяхдин пунктарал  бомбаяр вегьена.

23-август. Боевикар, дестейриз пай хьана, партизанвилин гьерекатрив эгечIзава.

24-август. Авиацияди Танди, Годобери… хуьрерин патарив даяхдин пунктар бомбаламишна.

25-август. РФ-дин Гьукуматдин 936-нумрадин къарардин бинедаллаз Дагъустандин территорияда террористрихъ галаз тухвай женгера иштиракай, телеф хьайи аскеррин ва къенепатан крарин органрин къуллугъчийриз ва абурун хизанриз талукь яз алава серенжемар кьабулна.­

( Гьазурайди — А.Гьамидов )