РФ-дин Почтади 2016-йисуз боевикри яна кьейи полициядин лейтенант, Россиядин Игит Мегьамед Нурбагандоваз бахшнавай 300 агъзур конверт гьазурнава. Мукьвара Махачкъалада конвертдин презентациядиз талукьарнавай мярекат кьиле фена. РД-дин Кьилин ва Гьукуматдин Администрациядин пресс-къуллугъди хабар гайивал, ана Владимир Васильевани иштиракна.
Ада Мегьамед Нурбагандован кьегьалвиликай, адан эхиримжи “КIвалаха, стхаяр” эвер гуни авур еке таъсирдикай лагьана.
“Террористри лентиниз къачунвай материалрикай дагъустанви кьегьал хцин эвер гун хкуднавай. Къанун-къайда хуьдай органри кьиле тухвай чешнелу кIвалахдин нетижада гьакъикъат арадал хкана. Къанлуйриз далдаламишиз кIан хьайи гьакъикъатдикай вири уьлкведиз хабар хьайила, халкьдин гьиссерал чан акьалтна. Яракьдин луьледин вилик Мегьамед Нурбагандова лагьай “КIвалаха, стхаяр” эвер гунин ван неинки са Дагъустандив, гьакIни вири Россиядив агакьна. Къе Игитдал вири уьлкведи дамахзава”, — къейдна Владимир Васильева.
Махсус конверт Мегьамед Нурбагандова игитвал къалурайдалай инихъ 3 йис тамам хьунихъ галаз алакъалу яз гьазурнава. Конвертдихъ галаз санал дагъустанви полицейскийдин игитвиликай куьруь малуматар алай махсус муьгьуьрни гьазурнава.
Россиядин Почтадин Дагъустанда авай филиалдин регьбер Махач Мегьамедова къейд авурвал, Мегьамед Нурбагандован шикил алай 300 агъзур конверт Россиядин вири регионрив агакьда.
Чи мухбир
