Республикадин юкьван пешекарвилин образованидин идарайрикай виридалайни “яшлубурукай” ва чIехи­бурукай сад тир Дагъустандин политехнический колледждихъ 90 йисан тарих ава — ам 1929-йисуз ачухнай. Алатнавай  де­вир­да адан тIвар са шумудра дегиш хьанай.­ Алай вахтунда колледж азаддаказ кьуршахар кьунай международный дережадин мастер, РСФСР-дин лайихлу тренер, 1972-йисуз  Мюнхенда хьайи Олимпиададин буьруьнждин медалдин сагьиб Руслан Нуралиевич Ашуралиеван тIвар­цIихъ гала.

90 йисан девирда колледжди юкьван дережадин 46550-далай гзаф пешекарар гьазурна. Абурукай гзафбур республикада ва маса регионра пар­тийрин ва майишатрин зурба руководителар хьанва. Юкьван ва махсус образованидин пешекарар гьазурунин рекье виниз тир агалкьунар хьунай, “Россиядин виридалайни хъсан 100 ССУЗ” номинациядин сергьятра аваз,  2008-2015-йисара  колледжди къизилдин “Европадин ери” медаль къазанмишна.

Юкьван образованидин пешекарар гьазурзавай идарада, къейд ийин, государстводин образованидин алай аямдин стандартар нетижалудаказ кьилиз акъудзава: региондин кьетIенвал ва педагогикадин илимдин эхиримжи агалкьунар гьисаба кьуна, чирвилер гунин цIийи  планар гьазурнава, инновациядин техно­ло­гияр кардик кутазва, авторвилин программаяр туькIуьрзава. Колледждин 130 преподавателдин арада РФ-дин ва РД-дин лайихлу муаллимар, халкьдин об­ра­зованидин отличникар, физический культурадин лайихлу работникар, РД-дин ла­йихлу художникар ава. 22 муаллим РФ-дин образованидин ва илимдин  министерстводин Гьуьрметдин грамотадин  сагьибар я. Пешедин рекьяй чирвилер гу­нин кIвалах 6 отделенидин къайдада кьиле тухузва: 5 йикъанбур я, 1 — заочный. Абурун арада  экономикадин ва юридический отделенини ава, ам 1996-йисалай кардик ква. Отделенидин кьиле РФ-дин СПО-дин Гьуьрметлу работник, гъавурда авай пешекар ва лап хъсан  инсан  Анжела Алиевна Салигьова ава.

Муаллимрикай заз гьакIни  Наида Халикьовна Абаковадин, Ума Багьаудиновна Исакьовадин, Людмила Саидагьмедовна Агьмедовадин тIварар кьаз кIанза­ва. Дерин чирвилер ва алакьунар авай абурун лекцийрихъ студентри хушвилелди яб акалда.

Яшайишдин рекьяй таъминвилин их­тиярар, государстводин ва ихтияррин теория, административный, хизандин, зегьметдин, уголовный, экологиядин, конституциядин, гражданвилин ихтиярар, страхованидин кIвалах ва экономикадин бине­яр — вири и хилерай дерин чир­вилер къачуни студентриз  гележег­да­ лайихлу кIва­лах жагъурун кьезиларзава.

Алатай йисан 22-мартдилай  инихъ  колледждиз экономикадин илимрин кандидат Мафият Мегьамедовна Рагьмановади регьбервал гузва. И куьруь вахтунда колледжда  виле акьадай хьтин дегишвилер хьанва. ИкI,  актовый ва спор­тдин  залар, махсус кабинетар, столо­вой ва 1-нумрадин общежитидин  5-мер­тебада капитальнидаказ ремонт авунин кIвалахар кьиле тухванва.

Директор яз, Мафият Мегьамедовна чирвилер гунин ва тербиядин кIва­лах  жезмай кьван вини дережадиз акъудиз алахънава. И карда адаз еке куьмек вичин заместителрикай: — илимдинни мето­ди­кадин рекьяй — Фатима Руслановна Агь­­медовадикай ва тербияламишунин ре­кьяй — Патина Гьуьсеновна  Мутаи­ло­ва­дикай ава.

Кьве гаф колледждин профсоюздикайни  лугьуз кIанзава. Хъсандиз кIелза­вай, жавабдарвал аннамишзавай студе­нтрикай ибарат профсоюзди колледждин уьмуьрда активнидаказ иштиракзава. И жигьетдай профкомдин председатель Къазиагьмед Багьаудинович Къазиагьмедован тешкилатчивилин  алакьунар екебур я.

Алай аямдин истемишунрал бинеламиш хьана ремонтнавай столовойда сту­дентриз дадлу тIуьнар гьазурзава, къи­метарни студентрин тIем акакьдайбур я.

Патарай атанвай студентриз яша­миш­ хьун патал общежитида чка гузва. Ина яша­йишдин лайихлу шартIар арадал гъан­­ва. Общежитидин комендант Гуьлзара Агьмедовна Гьажиева студентриз жезмай кьван къулай шартIар тешкилиз алахъ­зава.

Колледждин поликлиникади кIва­лахза­вай жуьре заз жуван вилералди акуна. Мукьвара зун, мекьи хьун себеб яз, азарлу хьана ва са шумуд юкъуз­ тарсарикай хкатна. Амма гьатта кьвед лагьай юкъуз  студентрин поликлиникадин духтур  зи кьилив атана ва, лазим тир ахтар­мишунар авуналди, дарманар кхьена. И кардай за поликлиникадин вири персоналдиз чухсагъул лугьузва.

Жуван группадикайни лугьун. Гьа и дестедиз акъатунал зун пара шад я. Чи куратор Жанна Анидиновна Мегьамедова акьван гьевеслу, кIвалахдал рикI алай, кIевелай алахъдай кас я хьи, отделенидин чIехи са мярекатни  чи дестедин иштираквал авачиз кьиле физвач.

Вучиз за технический колледж хкяна лагьайтIа, и кардихъ себебар гзаф ава. Зун и колледждин студент хьунал гзаф шад ва рази я.

Амал Къурагьмаев