ЦIийи ктаб
И мукьвара Дагъустандин ктабрин издательствода лезгийрин алай девирдин бажарагълу шаир, чlалан устад Шагьбала Шагьбалаеван “Зи руьгь, зи тан — ватан” тlвар алай иердаказ чlагурнавай, хкягъай шииррикай ва поэмайрикай ибарат ктаб чапдай акъатна.
Рикlел хкин, ам жуьреба-жуьре йисара басмадай акъатнавай “Карвандихъ рехъ”, “Зенгер”, “Гьакъикъатдин цlелхемар”, “Регьимдин тумар”, “Марфадин раб” ктабрин автор я. Шаирдин “Сноп стихов” шииррин кlватlал урус чlалалдини акъатна. “Тавази рагъ”, “Къуьлуьн кьилер” уртах кlватlалрикни шаирдин чlалар акатнава.
Къелемдин устадди дуьньяда тlвар-ван авай персерин классик Абдулкьасум Фирдоусидин “Рустам ва Зугьраб” поэма лезги чlалаз таржума авуна, кьилдин ктаб яз акъудна.
Винидихъ тlвар кьунвай цlийи ктабда хкягъай шиирар, поэмаяр, таржумаяр гьатнава. Шаирди илгьам авай цlараралди ватан кlан хьунихъ, халкьдиз вафалу хьунихъ, инсанвилихъни регьимдихъ, гьахъунихъни адалатлувилихъ эвер гузва.
Ктаб автордин 60 йис тамам хьуниз талукь яз акъуднава.
А.Эмирсултанов
