Алатай нумрайрикай сада чна газет кIелзавайбур Кабардино-Балкарияда яшамиш жезвай бажарагълу художник, Дагъустандин халкьдин писатель Къияс Межидован руш Сияра Аккизовадихъ галаз танишарнай. Къенин ихтилат писателдин хтулдикай — Имара Якьубовна Аккизовадикай я.
Амни алакьунар авай художник, Россиядин художникрин Союздин член я. Имара Аккизова 1972-йисуз Кабардино-Балкария республикадин меркезда художникрин хизанда дидедиз хьана. Ада Кабардино-Балкариядин госуниверситет, медениятдинни искусстводин училище, Кеферпатан Кавказдин гьукуматдин институт акьалтIарнава. Гьелбетда, дидени, бубани бажарагъ авай художникар хьайила, веледризни абурукай пай гун, абурун геле аваз фин мягьтел жедай кар туш. Гъилера рангар аваз, кIвале вилик мольбертар кваз чIехи хьайи Имаради гьеле аялзамаз вичин бажарагъдин цIирерикай хабар гана. Диде-бубадиз Имаради маса пеше хкяна кIанзавайтIани, бажарагъди адаз “ихтияр ганач”.
Инал кьетIендаказ къейд авун важиблу я, Имарадин буба Якьуб Аккизов КБР-да сад лагьай пешекар художник, балкарвийрикай сад лагьайди яз адакай СССР-дин художникрин Союздин член хьана.
И.Аккизовади КБР-дин ва зональный са шумуд (гьа жергедай яз 2004, 2008-йисара Краснодардани Сочида “Россиядин кьиблепад”, 2008-йисуз Кавказдин жегьил художникрин “Тарцихъ дувулар ава”) выставкайра иштиракна. Ам Кайсын Къулиеван юбилейдиз талукь международный симпозиумдин иштиракчини я. 2009-йисуз К.Къулиеван кIвале-музейда, 2010-йисуз Нальчикда КБР-дин, изобразительный искусствойрин музейда, Махачкъалада П.Гьамзатовадин тIварунихъ галай изобразительный искусствойрин музейда И.Якьубовнадин хсуси яратмишунрин выставкаяр тешкилна. Ам Майкопда кьиле фейи “Аждагьанар. Мифологиядин игитар” выставка-конкурсдин дипломдин сагьибни я.
Ада ктабар шикилралди безетмишунин кардикни еке пай кутунва — вишдав агакьна ктабар адан бажарагъди гуьрчегарнава. Жуьреба-жуьре материалрикай ниниярни туькIуьрзава.
“Ада чазни ашкара ийизвай, пайзавай алем — ам Кавказдин алем я, эгер адан суьретар маса шегьерра, уьлквейра акуртIа, инсанриз а суьретрин гуьрчегвиляй Кавказ чир жеда ва адал гьейранвалда”, — кхьизва КБР-дин “Дагъви дишегьли” газетдин кьилин редактор З.Кануковади.
Вич жегьил ятIани, бажарагълувили ам фад машгьурна. КIвалахда ада жуьреба-жуьре техника ишлемишзава: графика, живопись, рекъемрин шикилар…
ЧIехи бубадин — Къияс Межидован — ватан тир Ахцегь Имарадиз гзаф хуш я. “Мектебда гатун тIатIилар гайила, чна гьар йисан пуд варз Ахцегьа акъуддай. За жуван аял вахтар вири Ахцегьа акъатай хьиз гьиссзава. А вахтар лап хъсанбур тир. Гьар мумкинвал хьайила, Дагъустандиз хъфизва зун, жув ина аватIани, зи руьгь гьана ава”, — лугьузва жегьил художникди. Къуй адахъ гележегда мадни еке агалкьунар хьурай!
К. Ферзалиев
