Коронавирусдин тIугъвалдихъ галаз алакъалу яз муракаб гьалара гьатнавай вахтунда гзаф уьлквейри, и кар гьеле мумкин тир вахтунда, къецепатан государствойрай маса къачузвай  суьрсетрин, гьа жергедай яз техилдин  кьадар жезмай кьван гзафариз алахънава. И мукьвал тир вахтуналди  и ре­кьяй игьтияжар  Россиядай тир таъминчийри тамамарзавай, амма гила “и пенжер агал хьанва”, кхьизва Bloomberg агентстводи.

Эхиримжи 10 йисан вахтунда сифте сеферда яз дуьнья Россиядай тир къуьл амачиз амукьун мумкин я, гьа са вахтунда чи уьлкведин техилдин са жерге асул муьштерийри, тIугъвал­дихъ галаз алакъалу яз, алава кьадар маса къачуз тади ийизва.

Къуьлуьн къиметар хкаж хьунин  вилик пад кьун патал, РФ-дин хуьруьн майишатдин министерстводи мартдин эхирдай къецепатан уьлквейриз маса гузвай техилдин кьадар вахтуналди сергьятламишун теклифнай: 30-июндалди  Россиядай  къецепатаз тухузвай къуьлуьн кьадар 7 миллион тонн­дилай гзаф хьун лазим туш. Квота июндин эхирдалди тайи­нарнавайтIани, гьеле 26- апрелдалди Россияди ам  та­мам кьадарда аваз кьилиз акъуднава ва къецепатан уьлквейриз маса гун акъвазарнава. Малум хьайивал, и къадагъа 1-июлдалди, яни техилдин цIийи бегьер вахчуз башламишдалди давам жеда. Хабар гузвайвал, къадагъа къуватда гьатайдалай кьулухъ Россияди техил  виликан СССР-дай тир вичин анжах кьуд къуншидиз маса гун давамарда.

Дуьньяда гьалар  мадни четинарзавайди а кар я хьи, техил маса гунин кардал са жерге маса уьлквейрини сергьят эцигнава, ида лагьайтIа глобальный алишверишда дегишвилер хьунал гъун мумкин я ва недай суьрсет бес тахьунин, къиметар хкаж хьунин къурхулувал арадал гъида.

Пешекарри гьисабзавайвал, муьштерияр техилдин запасар жезмай кьван гзаф ийиз алахънава, вучиз лагьайтIа, абуруз чизва: идалай кьулухъ ихьтин мумкинвал тахьунин къурхулувал екеди я. Муькуь патахъай килигайтIа, гьисабзавайвал, Россиядин техил маса гу­нал къадагъа эцигун и рекье чи уьлкведихъ галаз гьуьжетарзавай США ва ЕС-дин  государствояр патал хийирлу я.

РФ-дин хуьруьн майишатдин министерстводин  сергьятвилер Россия патал важиблу техилдин са жерге ­жуьрейриз талукь я. Иник къуьл, сил, абурун къаришма тир меслин, гьакIни мух ва гьажибугъдаяр акатзава. Техилдин жуьрейрин тумариз и квота талукь туш.

«Лезги газет»