И йикъара Докъузпара райондин Усугъчай хуьруьн мектебда республикадин «Зи рикI алай Пушкин» конкурсдин муниципальный пай кьиле фена. Аялар А.С.Пушкинан яратмишунрин ирсинихъ галаз хъсандиз танишарунин, абуруз урусрин меденият кIанарунин макьсаддалди тухвай конкурсда яратмишунрал машгъул 14 коллективди (мектебра кIелзавай 123 аялди) иштиракна.

Конкурсдин кIвалахдиз къимет гузвайбурун дестедик райондин образованидин управленидин методистар тир О.Османов, Т. Муллина ва УВР-дин рекьяй директордин заместитель А.Гьабибов квай.

Конкурсдин истемишунриз килигна, жюридин дестеди вири иштиракчийриз къимет гана. Нетижада 9-11-классрин арада 1-чка Мискискарин мектебдиз, 2-чка Аваданрин мектебдиз гана. 5-8-классрин арада 1-чка Усугъчайдин мектебдин сад лагьай дестедиз, 2-чка Усугъчайдин мектебдин 2-дестедиз ва ЦIийикаракуьредин мектебдиз, 3-чка Усугъчайдин мектебдин 3-дестедиз, гьа и мектебдин 4-дестедиз, Миграгърин мектебдиз ва Миграгъ-Къазмайрин мектебдиз гана.

Муниципальный паюна иштиракунай вири дестейриз грамотаяр гана.

«Лезги газет»