Мегьарамдхуьруьн районда пулдихъ ийидай къуллугърин гьакъи нагъд пул галачиз гуз жедай мумкинвал таъминарзавай «Нагъд пул авачир Дагъустан» проект бажармишунин жигьетдай кIвалахар кьиле тухузва. И гьакъиндай «Лезги газетдиз» райадминистрациядин пресс-къуллугъди хабар гузва.

Серенжемдин макьсад пулдин такьатрихъ галаз алакъалу месэлаяр михьидаказ, ачухдаказ гьялун, нагъд пул кардик хьунин гьал агъузарун я.

Дагъустан республикадин ва «Сбербанк» ПАО-дин арада санал кIвалахунин гьакъиндай кутIуннавай икьрардин бинедаллаз, тIвар кьунвай проект «Мегьарамдхуьруьн район» МР-да бажармишун патал алай йисан 10-октябрдиз и райондин кьили къарар акъудна. Къарардалди райондин сергьятра проектдиз талукь яз тухудай серенжемрин план тестикьарнава.

Малум хьайивал, «Нагъд пул авачир Дагъустан» проект районда уьмуьрдиз куьчуьрмишун патал махсус дестени арадал гъанва. Кьилди къачуртIа, алай вахтунда райондин вад карчиди чпин алвердин майданра  POS-терминалар кардик кутунал разивална. Къейднавай карчийриз талукь делилар авай сиягь Сбербанкдал агакьарнава. Чешмеди алава хъувурвал, и проекдин кIвалах гьеле давам жезва.

«Лезги газет»