Россиядин оборонадин министерстводин алакъадин къуллугъди Украинада кьиле тухуниз мажбур хьанвай военный махсус серенжемда викIегьви­лел­ди иштиракзавай, командиррин четин тапшуругъар ян тагана ва къагьриманвилелди кьилиз акъудзавай аскеррикай малуматар гун давамарзава.

Буржидиз ва Ватандиз вафалувал къалурзавай уьтквем офицеррин арада Суворован медалдалди къейднавай Руслан Къурбановни ава. Кьасумхуьруьн 2-нумрадин юкьван школа куьтя­гьай жегьил военный институтдик экечI­на. Россиядин армиядин жергейра, Смоленскда авай частара къуллугъ ийиз цIе­рид йис я. Махсус серенжемдив эге­чIай гьа сифте йикъарилай ротадин командирди уьлкведин итижар, милли ха­тасузвал хуьн патал женгинин везифаяр чешнелудаказ тамамарзава.

МасакIа хьун гуьзетни авун герек авач. Ада ватанпересвилин ерияр вине кьазвай кIвале тербия къачуна. Русла­нан­ дах машгьур спортсмен, дзюдодай, самбодай дуьньядин чемпион, хъсан тренер я. Ада хсуси такьатралди спортдин секция ачухна ва ана цIудралди же­гьилриз халис спортсменар, Ватандал рикI алай кьегьалар жез куьмекзава.

Херсондин областдин Чкалово шегьердал гьужумдайла, майор Гьашимов Абасан регьбервилик квай штурмдин дес­те душмандин артиллериядин харцик акатна. Вич-вичивай квахь тавур офи0церди миллетбазриз дуьзгуьн жаваб гудай ва десте саламатни ийидай тапшуругъар гана. Гьа идалди вичин аскерар телеф хьуникай хвена. Амма вич хаталувилик кутуна. Залан хер хьанвай кьве аскер женгинин майдандилай саламат чкадиз ахкъуддайла, Абасахъ душмандин гуьллеяр галукьна ва ам телеф хьана. Частунин командирди адан документар Россиядин Игитвилин тIвар гун патал рекье тунва.

Жуьрэтлувилин ерияр сержант Давид Асаевани къалурзава. Нубатдин хуьр азад авун патал гьазур жезвай Россиядин подразделенидал миллетбазри гьужумна. Абуруз, акъваз тийиз, мино­мет­чикрини куьмек гузвай. Тупунин са гуьлле артиллеристрин взводдин командирдин заместитель, сержант Давид Асаеван тупунихъ галукьна. Душмандин патахъай къвезвай гуьллейризни килиг тавуна, сержантди аскерриз саламат чкада кIеви хьунин буйругъ гана, къайдадикай хкатай туп туькIуьр хъувуна. Ахпа душман авай чка чирна ва миллетбазрин винел хар къурна. Абурун кьве миномет ва 18 миллетбаз тергна. Сержант Асаеван пешекарвилин, викIегь гьерекатри подразделенидиз душмандин гьужум алуддай, адаз хейлин зиянар гудай ва ахпа гьужумдиз фидай мумкинвал арадал гъана.

“Жуьрэтлувилин” ордендиз лайихлу хьанвайбурун арада инженервилинни саперрин ротадин командир  Алиев Абдурашидни ава. Новочеркасскдин политехнический институт ва Южно-Российский технический университетдин инженеррин частарин кафедра куьтягьай лейтенантди Россиядин Яракьлу къуватрин частара къуллугъиз ирид йис я. 2020-йисалай капитан инженерный къуллугъдин начальник тир. Къе ада, инженерринни саперрин ротадин командир яз, военный махсус серенжемда иштиракзава.

Россиядин частар гьужумдиз фидалди вилик Алиеван ротади душманди минаяр кутунвай чкаяр михьун, чи аскерриз саламат рехъ туькIуьрун лазим тир. Вичин дестени галаз кардик квайла, абурал душманди хабарсуз гьужумна. Кьве аскердал ва старший лейтенантдал хирер хьана. Кьве аскер саламат чкадиз ахкъудиз агакьна, старший лейтенант ярх хьанвай чкадиз миллетбазри акъваз тийиз гуьлле гузвай. Вуч авуртIани, ам къутармишун лазим тир. Галайбуру “фимир, ам кьенвайди я, ахпа, чибур агакьайла, вахчуда ам” лагьана­тIани, Абдурашида, миллет­базрин патахъ, акъваз тийиз, гуьлле гун буйругъна ва вич офицердин гьарайдиз фена. Гена адал чан аламай. Капи­танди, эглеш тавуна, офицер хатасуз чкадиз чIух­гуна ва къутармишна. Ам исятда госпиталда ава, хирер сагъар хъийизва.

ВикIегь командирди Сирияда кьиле тухвай серенжемрани иштиракайди я. Ам “Женгинин тафаватлувиляй” ме­далдин, РФ-дин оборонадин министерстводин гьуьрметдин грамотайрин са­гьибни я.

Донецкдин са хуьруьн патав тактикадин батальондин алакъа таъминарзавай сержант Сергей Ибрагьимован десте Украинадин яракьлу миллетбазрихъ галаз барабарсуз женгиник экечIуниз мажбур хьана. Сада-садаз гуьлле гузвай вахтунда Ибрагьимов авай штабдин машин душмандин минадал хъиткьинна ва ада цIай кьуна. Кьилин мефтIер къарсур хьунизни (контузия) килиг тавуна, сержантди хер хьанвай водитель машиндай акъудна ва ам къутармишна. Ахпа алакъадин хсуси алатралди артиллериядин подразделенидиз душман алай чкайрикай хабар гана. Артиллерис­трини, гежел тевгьена, радикалрин сенгерриз цIай гана. Сержант Ибрагьимован пешекарвилин, зиреквилин гьерекатри штабдихъ, герек частарихъ галаз пайгар алакъа хуьдай ва боевикрин дестеяр тергдай мумкинвал арадал гъана.

Хийир Эмиров