18-майдиз  Ставрополдин крайдин Минводы шегьерда  РФ-дин хуьруьн майишатдин министерстводи ва Хипехъанрин Милли союзди тешкилнавай  Россиядин  жинсинин лапагрин ва цIегьерин  21-выставкади вичин кIвалах башламишна, хабар гузва чаз РД-дин хуьруьн майишатдин ва недай суьрсетдин министерстводин информациядин къуллугъди.

Гегьенш мярекатда Дагъустан Республикадин патай РД-дин Гьукуматдин Председателдин заместитель Абдулмуслим Абдулмуслимова, хуьруьн майишатдин ва недай суьрсетдин министр Баттал Батталова, адан заместителар тир Эмин Шайхгьасанова ва Зураб Къуч­чаева, гьакIни  республикадин малдарвилин кар алай 16 майишатдин векилри иштиракна.

Дагъустандин аграрийри Ставропольедиз Дагъустандин дагъдин, лезги, тушинрин, Андидин лацу ва цIийиди тир “Артлухдин меринос” жинсерин лапагар гъанва. Абур выс­тавкада иштиракзавай Гуниб райондин “Чох” ва “Согратль” агрофирмайра, “М.Гьажиеван тIва­ру­нихъ галай” ва “Милюб” СПК-ра, Гум­бет райондин “Чед”, “Ухо”, “Салам-А”, Хунзах райондин  “Стела”, “Машгьур ксар”, Казбек райондин “Яру октя­брь”, “Алмак”, Гергебил  райондин “Да­рада-Мурада”, Буйнакский райондин “Архар”, Тляратадин  “Джурмут-1” майишатра, Ах­цегь райондин “Восход”  СПК-да ва Рутул райондин  “Восток-2” СПК-да хуьзвайбур я.

Къейд ийин, алатай вири йисара Дагъустандин майишатри адетдинди хьанвай и выставкадин  хейлин конкурсра гъалибвилер къазанмишна. Алай йисузни чи хипехъанри республикадин тIвар виниз акъуд­дайдак умуд кутунва.

Вири и майишатри конкурсдин программайра иштиракзава. Акъажунрин нетижаяр выставкадин эхиримжи юкъуз кьада. Выставкадин сергьятра аваз гьакIни  семинарар ва илимдин конференцияр кьиле физва­. Абурукай сада — гьасилзавай лапагрин якIун кьадар артухаруниз талукьда — республикадин хуьруьн майишатдин ва недай суьрсетдин векилри иш­т­иракна. РикIел хкин, и месэладиз республикада эхиримжи вахтара  кьетIен фикир гун планламишнава.

Алава хъийин, выставкайрин “Минводы-Экспо” центрадин мулкунал  регионрин милли майданарни ачухнава, хуьруьн майишатдин тех­­никадин выставкаяр ва уьлкведин селекциядин месэлайрал машгъул илимдин  идарайрин, гьа жергедай яз РД-дин Федеральный аграрный илимдин центрадин стендарни ачухнава.

Россиядин  жинсинин лапагрин ва цIегьерин  21-выставкадин кIва­лах 21-майдалди давам жеда.

«Лезги газет»