Чи ерийра гзаф экъечIзавай жикIийрикай (шиповник) инсандин беден патал гзаф хийир ава. Кьилди къачуртIа, жикIияр ргай яд дармандин такьат яз ишлемишиз жезва. Гьа са вахтунда адакай зарар хьунни мумкин я. Гьавиляй гьар са набатат дармандин еринда ишлемишдайла, адакай хкатдай хийирни зарар фикирдай акъудна виже къведач. И жигьетдай сифте нубатда пешекаррал алукьун гзаф важиблу я.
ЖикIийрин тумарин чIемедикай косметикадани гегьеншдиз менфят къачузва. ВакIан кIирийрилай къуватлу яз, жикIийрин тумарин чIемеди хам кьуру хьунин азарар сагъарзава. Витаминралди девлетлу тир жикIияр са шумуд азардин аксина ишлемишиз жеда.
И набататдик аскорбиновый кислота гзаф ква. Сарарин винел патан къатариз чIуру таъсир тавун патал пешекарри жикIийрин гьалима къаргъу хьтин затIунай хъун меслят къалурзава. Къейдна кIанда хьи, ргай циз чайдин еринда жикIияр вегьена, гьам хъунал рикI алай ксарни тIимил авач.
Гзаф чешмейри тестикьарзавайвал, жикIияр ргай яд гьам сагъарунин, гьамни азардин вилик пад кьунин, юргъунвал алудунин мураддалди ишлемишиз жеда. ЖикIийрикай авунвай хъвадай ци мефтIедин кIвалах хъсанарунизни хийир гуда. Амма жикIийрин гьалимадикай яргъалди менфят къачун тавун меслятзава. РикIин азарар авайбуру хъун патал жикIийрин гьалима гьазурдайла, адак иниярни кутун менфятлу яз гьисабзава.
Хуквадин азарар авай ксари, жикIийрикай менфят къачудайла, духтуррин теклифрихъни меслятрихъ яб акалун чарасуз я.
«Лезги газет»
