“Газпром межрегионгаз Махачкъала” ООО-ди нубатдин сеферда тагькимарзава: тIебии газдин тадаракрин патав фидай мумкинвал тагузвай муьштерийрин хиве закондин вилик жавабдарвал гьатзава.
Газ паюнал (муьштерийрал агакьарунал) машгъул карханадин хиве кIвалерин, гьакIни квартирайрин къенепата авай газдин тадаракар йиса садра ахтармишунин везифа ава. Инсанри газовикар чпин кIвалериз ахъай тавунин себебар гьар жуьрединбур хьун мумкин я. Гзаф вахтара гьалар ахьтинбур жезва хьи, кIвалин иеси маса регионда яшамиш жезва, ам жагъуриз жезвач ва ам авай чкадиз талукь делиларни авач. Бязибуру лагьайтIа, и кар къастуналди ийизва. Бязибуру, месела, чпин кIвалера гьакIни вири къайдада авайди яз ва са гьихьтин ятIани ахтармишунар кьиле тухунин, башкъа яз, и кардиз харжиярни авунин лазимвал авачирди яз гьисабзава. Масадбуру пешекарар кIвалериз ахъай тавунин себеб ам я хьи, абуруз чпи гъалатIриз рехъ ганвайди чизва — я пич лазим чкадал алач, я тахьайтIа, газдин турба дуьздаказ ишлемишзавач. Пуд лагьай жуьре ксари ракIар ачух тавун адахъ галаз алакъалу я хьи, абуру газ законсуздаказ ишлемишзава, газдин кьадар гьисабдай счетчикрин механизмайрик хуькуьрзава ва икI мад.
Газдин идарадин пешекарриз газдин тадаракар ахтармишдай ихтияр тагунай законди жермеяр тайинарнава.
КIвалерин ва квартирайрин къенепата авай газдин тадаракриз (ВДГО/ВКГО) технический рекьяй къуллугъ авунин гьакъиндай икьрар кутIунуникай кьил къакъудуни, гьакIни пешекарламишнавай карханадин къуллугъчи вичин вези-фаяр тамамарун патал ВДГО/ВКГО-див агуд тавуни агьалийрал 1000 ва 2000 манатдин кьадарда аваз жерме илитIунал гъизва.
Гьа са вахтунда газ ахъа ва хъиткьинарунар хьайи дуьшуьшар кIвалерин къенепата авай газдин тадаракар ахтармиш тавур чкайра жезва. Иллаки кичI кутадай кар я, эгер ихьтин инсанар гзаф мертебайрин кIвалера яшамиш жезватIа.
Виликамаз хабар гудай жуьредикай ва идарадин векил газдин тадаракрин патав ахъай тавунин нетижайрикай 410-къарарда кхьенва. Закондин бинедаллаз, ихьтин ксарин кIвалер газдалди таъминарун акъвазардай ихтияр ава. Эгер кIвале са касни яшамиш жезвачтIа ва газ ишлемишзавачтIа, иесиди идакай газдин къуллугъдиз хабар гун лазим я. Ихьтин дуьшуьшра кIвализ физвай турбадал газ акъвазардай алат эцигзава.
Эгер ВДГО-дин ТО тамамаруниз талукь суалар арадал къвезватIа, абур 04, 104 (мобильный телефондай), гьакIни “Газпром межрегионгаз Махачкъала” ООО-дин колл-центрадиз 8-800-200-98-04 нумрадай зенг авуна гуз жеда.
«Лезги газет»
