Хъсан адет хьанвайвал, 1-октябрдиз Ахцегь райондин КЦСОН-да (жемятдиз яшайишдин рекьяй къуллугъунин Центр) Яшлубурун международный йикъан сувар гурлудаказ къейдна. Центрадин къуллугъчийри, далудихъ уьмуьрдин девлетлу тежриба галай гьуьрметлу ксариз гьар са нямет алаз дуьзмишнавай суфраяр ачухнавай. Мярекатда гьакI “Ахцегь район” МР-дин кьил Осман Абдулкеримова, райондин Общественный палатадин председатель Али Исмаилова, райадминистрациядин крар идара ийизвайди тир Вадим Агъасиева, культурадин управленидин начальник Къистер Гъаниевади, “ЦIийи дуьнья” газетдин кьилин редактор тир и макъадин авторди ва маса мугьманри иштиракна.
КIватI хьанвайбур хуш келимайралди тебрик авуналди, мярекат КЦСОН-дин директордин заместитель Фироза Гьамзаевади ачухна ва сифте гаф Центрадин директордин везифаяр вахтуналди тамамарзавай Мирвара Мусанабиевадиз гана.
— Гьуьрметлу диде-бубаяр, бадеярни чIехи бубаяр! Лезги халкьдиз “Патав чIехиди гвачтIа, са чIехи къванцел хьайитIани алукь”, “Рагьметдиз фенвай бубадин бармак вилик эцигна, гьадал меслят гъваш”, “Женнет диде-бубадин кIвачерик ква” лугьур камаллу мисалар ава. Куьн хьтин камаллу меслятчияр, насигьатчияр галай чун бахтлу ксар я. Къуй куьн, гуьгьуьлар къумбар яз, чахъ яргъалди галамукьрай. Суварин и къени суфра, концерт — вири куьн паталди я, буюр! — лагьана Мирвара Мусаевнади.
Рахунрин арада РДК-дин манидар Исмаил Ризаханова ва КЦСОН-дин къуллугъчийрини абурун къаюмвилик квай аялри мярекатдин иштиракчийрин гуьгьуьлар музыкадин нумрайралди шадарзавай.
Гаф Ахцегь райондин кьил Осман Абдулкеримова къачуна: — Гьуьрметлу диде-бубаяр! Куьн яшлубурни кьуьзуьбур ваъ, камаллу чIехибур я. Къе чи дережа — вири агалкьунар, якъин, куь гьунаррин нетижа я. Акьалтзавай несил кIвачел акьалдарун, дуьздаказ тербияламишун патал куьне къачузвай зегьметдай чухсагъул! ЧIехибуруз гьуьрмет ийизмай кьван гагьда жегьилрин крарни вилик фида. ЧIехибуруз гьуьрмет тийизвай хизанар аватIа, гьабурузни акурай, чир хьурай, дуьз рекьел хтурай лагьана тухузвай и мярекат тешкилнавай ксарни пара кьадар сагърай…
Мярекатдал тебрикдин хуш келимаяр райондин культурадин Управленидин начальник Къистер Гъаниевади, Общественный палатадин председатель Али Исмаилова, и цIарарин автордини лагьана. Абуру залда авай диде-бубайриз ва райондин вири яшлубуруз и сувар рикIин сидкьидай мубаракна.
Чпин нубатдай Зегьметдин Яру Пайдахдин кьве ордендин сагьиб Агъаверди Агъаева, зегьметдин ветеранар тир Асия Рагьимовади (ада вичин шиирни кIелна), Низам Пирсаидова, хуьруьгви Алисултан Алисултанова, цуругъви Мегьи Рагьимовади, луткунви Гуьлебатун Къличхановади, кьакIавияр тир Надир Замановани Шайнисе Аслалиевади ва масабуру, чеб рикIел атана, икI хъсандиз кьабулунай, гьар йикъан къайгъуйрикай хкудна, рикIер шад авунай, хъсан концерт гунай райондин руководстводиз, КЦСОН-дин коллективдиз пара кьадар сагърай лагьана. Эхирдай, яшлубур агъмишун яз, абуруз гъвечIи савкьатарни гана.
Дашдемир Шерифалиев
