Мегьарамдхуьруьн районда милли “Самурский” парк тешкилуниз талукь месэладай общественный яб акалунар кьиле фена.
Мегьарамдхуьруьн райондин администрациядин 2018-йисан 17-майдин къарардал асаслу яз райондин администрацияда 19-июндиз общественный яб акалунрин мярекат кьиле фена. Ам милли “Самурский” парк тешкилунин лазимлувал, и мулкуниз кьетIендаказ хуьзвай, федеральный метлеб авай мулкунин дережа гун бинеламишзавай материалар веревирд авуниз талукьарнавайди тир. Идан гьакъиндай “Лезги газетдиз” Мегьарамдхуьруьн райондин администрациядин пресс-къуллугъди хабар гана.
Мярекатда Мегьарамдхуьруьн райондин кьил Фарид Агьмедова, “Вирироссиядин элкъуьрна кьунвай тIебиат хуьнин илимдинни ахтармишунардай институт” ФГБУ-дин векилри, “Дагестанский” заповедникдин къуллугъчийри, республикадин тIебиатдин ресурсрин ва экологиядин министерстводин векилри, проектировщикри ва райондин агьалийри иштиракна.
Мярекат ачухай райондин кьил — общественностди веревирд авунин серенжемар кьиле тухунин рекьяй комиссиядин председатель Фарид Агьмедова къейд авурвал, вири жуьрейрин месэлаяр гьялдай чIавуз ада гьамиша законодательстводал амал ийида, гьа са вахтунда халкьдин итижар чарасуз яз вилив хуьда.
Месэла общественностди веревирд авуниз гьазурвал акунин барадай закондалди къалурнавай шартIар администрацияди кьилиз акъуднава, общественностди яб акалунар тешкилунин гьакъиндай малуматар СМИ-ра чапна ва Интернетдин сетдай раижна.
Общественностдин яб акалунар тешкилайди “ВНИИ Экология” ФГБУ я.
Мярекатдал рахай Фарид Агьмедова къейдна: “Алай аямдин шартIара Дагъустандин кьиблепата ланшафтдин ва биологиядин жигьетдай жуьреба-жуьревал хуьн патал мулкарин саламатвал таъминарунин виридалайни менфятлу жуьре милли парк я. Идалайни гъейри, милли “Самурский” парк тешкилунин кIвалах 2020-йисан девирдалди федеральный метлеб авай, кьетIендаказ хуьзвай тIебиатдин мулкарин система вилик тухунин Концепциядал асаслу яз кьилиз акъудзава. А Концепцияда тIебиатдин кьетIендаказ хуьзвай и мулкуна милли парк 2018-йисуз тешкилун къалурнава”.
Месэла веревирд авунин сергьятра аваз докладар “ВНИИ экология” ФГБУ-дин илимдинни методикадин “Заповедное дело” центрадин руководитель Дмитрий Очагова, Краснодар шегьердин ЦЭПСА ООО-дин векил Марина Сергеевади, Виридуьньядин тIебиатдин фондунин — “Россиядин Кавказ” отделенидин векил Роман Мнацеканова ва масабуру авуна. Рахайбуру милли “Самурский” парк винидихъ тIвар кьунвай, вич РФ-дин Гьукуматдин 2011-йисан 22-декабрдин тапшуругъдалди тестикьарнавай Концепциядин бинедаллаз тешкилзавайдакай, гьакIни милли паркдин мурадрикай ва везифайрикай Самурдин сармашухрин (лианайрин) там, кьит ва чпиз фад хасаратвал жезвай жуьрейрин гьайванар хуьн патал и мулкунихъ авай метлебдикай, гьакIни этнокультурадин, яшайишдин экономикадин жигьетдай адан важиблувиликай суьгьбетна. Роман Мнацеканова милли парк тешкилуниз талукь проект вичин баянарни галаз раижна.
Месэла веревирддай чIавуз мярекатдал гьам алимар, гьам чкадин агьалияр рахана. Самурдин тамун патарив гвай хуьрерин агьалийри — месэла гьялунин иштиракчийри теклифнавай проектдин са бязи пунктарик дегишвилер кухтун, кьилди къачуртIа, хуьрерин агьалийриз саламатдиз хуьзвай зонадиз майишатдин игьтияжар кьилиз акъудун патал азаддаказ фидай ихтияр гун теклифна. И ва са жерге маса теклифар гьисаба кьуна ва абур проектдик дегишвилер кухтадайвал протоколда къейдна.
Марина Сергеевади малумарайвал, чкадин агьалияр кардин гьакъикъатдин гъавурда дуьздаказ тун лап важиблу я: я райондин руководство, я илимдин идарайрин векилар инсанрин итижриз зиян гуз кIвачин жезвайди туш. Ихтилат сармашухрин там хуьникай ва ам пайгардик кутун патал лазим тир чараяр акуникай физва.
Мярекатдин иштиракчийрикай сада Самурдин зонада мад сеферда и месэладай яб акалунар кьиле тухун теклифна, гьикI лагьайтIа са десте футфачийри, милли паркдиз талукь месэладиз дуьздаказ баян тагуналди, районда гьалар пайгардикай хкудунин алахъунар авуна.
Мярекатдал агьалияр теклифнавай проектдин вири положенийрин гъавурда мукьуфдивди тунин къарар кьабулна.
Эхирдай райондин кьил Фарид Агьмедова общественный яб акалунин вири иштиракчийриз веревирд авур месэладив дуьзгуьндаказ эгечIунай сагърай лагьана.
Чи мухбир
