Майдин вацра Волгограддин областдин Волжский шегьердин шикилрин галереяда «Жегьре пакаман нефес-2» («Дыхание розового утра-2») тIвар алаз Белиж поселокдай тир машгьур художник, Россиядин художникрин союздин член Мелик-Мамед Агъабалаеван живописдинни графикадин кIвалахрин выставка хьана. Экспозиция 50 эсердикай ибарат тир. М.-М.Агъабалаева аниз Дагъустандин тIебиатдин гуьзелвиликай, тарихдин чинрикай, адетрикайни ацукьун-къарагъуникай яратмишнавай эсерар тухванвай. Хайи чкайрин пейзажрай, къадим Дербентдин акунрай, натюрмортрай, алай аямдин ксарин, дустарин ва машгьур инсанрин портретрай, тарихдин шикилрай гафаралди лугьуз тежер хьтин гуьзелвал, гьиссерин михьивал, тарихдин гьакъикъат, рангарин къешенгвал, Ватандал, хайи макандал рикI алай касдин гьиссер рангаралди чIугунин тегьер аквазва.
А выставкада Россиядин художникрин союздин членар Л.Рамазановадин (Ставрополдин край), М.Охременкодин (Волжский), А. Шевцован (Москва) яратмишунрин кIвалахарни авай.
Экспозицияда Белиж поселокдай тир Э.Гьажиевади храна гьазурнавай затIарини выставкадиз атанвайбурун фикир желбна.
Винидихъ тIварар кьунвай художникрин дестедин яратмишунрин выставкаяр Грозный шегьердин Ахмат Къадирован тIварцIихъ галай Баркаллувилин мемориалдин комплексдани Ставрополдин гьукуматдин музей-заповедникда агалкьунралди кьиле фена.
15-июндиз, Муаллимдинни насигьатчидин йисан сергьятра аваз, Мелик-Мамед Агъабалаеван живописдин графикадин яратмишунрин кIвалахрин выставка къадим Дербент шегьердин музей-заповедникда кьиле фена. Ана, М. Агъабалаевалай гъейри, «Жегьре пакаман нефес-2» дестедик квай винидихъ тIварар кьунвай художникрини иштиракна.
Музей-заповедникдин руководстводи выставка тешкилай чи ватанэгьлидиз сагърай лагьана ва вири художникриз разивилин чарар гана. Выставка 13-июлдалди давам жеда. Яратмишунрал рикI алай виридаз, аниз фена, искусстводин рангарин гьиссерин гуьзелвилихъ галаз тиниш жедай мумкинвал ава.
Къагьриман Ибрагьимов
