27-июндиз Кьасумхуьруьн «Кпул ятар» санаторийдин сергьятра Жегьилрин йикъаз талукь шадвилин мярекат кьиле фена, — хабар гузва «Лезги газетдиз» муниципалитетдин администрациядин пресс-къуллугъди.

Сулейман-Стальский райондин жегьилрин парламентди образованидин управленидин ва физический культурадин, спортдин, туризмдин ва жегьилрин крарин комитетдин куьмекдалди тешкилна.

Мярекатда райондин кьилин заместителар тир Абутlалиб Фатулаева ва Аким Жаватова, УО-дин начальник Къачабег Аминова, Махачкъаладин нейро-лингвистический программированидин центрдин векилар тир Альбина Гьажиевади ва Тимур Варисова, Шихидхуьруьн, Юкьван Стlалрин КВН-дин дестейри ва масабуру иштиракна.

Жегьилрин адресдиз мярекатдин иштиракчийри тебрикдин хуш келимаяр лагьана. Аким Жаватова райондин уьмуьрда жегьилри важиблу роль къугъвазвайди къейдна.

Мярекатдин сергьятра аваз Альбина Гьажиевади ва Тимур Варисова жегьилар патал дилавардиз рахунин жигьетдай мастер-классар къалурна. Гуьгъуьнлай спортдин мили жуьрейрай жегьилрин фикир желбдай акъажунар кьиле фена.

«Лезги газет»