И мукьвара Ахцегь райондин прокуратурада “Терроризмдин вилик пад умуми къуватралди кьан” лишандик кваз суьгьбет кьиле фена.
Мярекат ачухай прокурор Шекерханум Тагьировади лагьана: “Гьуьрметлу юлдашар, терроризмдинни экстремизмдин рекьяй районда виле акьадай хьтин тахсиркарвилер авачтIани, секин хьана ацукьдай ихтиярни чаз авач. Вичикай ихтилат физвайди ахьтин хаталу тIегъуьн я хьи, адан вилик пад чи виридан умуми къуватралди кьаз жеда. Сириядиз чи патарай фенвайбур чIуру ниятар аваз элкъвена хтун мумкин я. Интернетдин куьмекдалди жегьилар рекьяй акъудна, абур чпин жергейриз желбиз алахъзавай (Интернетда 5 агъзурдалай виниз гьахьтин сайтар ава) шартIара чун мадни сад, мукъаятлу ва гужлу хьана кIанда”. Адан тереф амайбуруни хвена.
Роберт Гьамзаев, общественный хатасузвал хуьнин рекьяй Ахцегь муниципалитетдин кьилин заместитель: — Разивилелди лугьун, маса чкайрив гекъигайла, районда гьалар секин я. Им чна жегьилрихъ галаз эдеб-ахлакьдин, тербиядин ва абур спортдал желб авунин серенжемар кьиле тухунин нетижа я. Шаз санлай районда тербиядин манадин 2000-далай артух гьар жуьре серенжемар тешкилна, Ахцегьа, Хуьруьга, Цуругъа спортмайданар кардик кутуна. Чна кьатIузвайвал, жегьилар экстремистрин таблигъат-таъсирдик акатунин кьилин себебар — диндин месэлайрай жегьилрин савадсузвал ва яшайишдин четинвилерал нарази хьун я. Гьавиляй жаванар зегьметдин чкайралди, яшайишдин къулай шартIаралди, культурадинни спортдин къулайвилералди таъминарна кIанда.
Абдулашим Абдулгьашумов, Ахцегьрин Жуьмя мискIиндин имам: — Асул гьисабдай чи районэгьлияр бубайрин адетриз, диндин къайдайриз муьтIуьгъбур я. Тама чакъал кими жедач лугьудайвал, абурун арайра сад-кьвед чIуру рекьел алайбурни ава. Абурухъ галаз алакьдайвал гъавурдик кутунин кIвалах тухузва. Жегьилар чкадал ваъ, шегьер-риз акъатайла чIуру таъсирдик акатзава. Гьавиляй диде-бубайри веледар чпин кьетIен гуьзчивиликай хкуд тавун важиблу я. Чна мискIинра гьар жуьмядин кпIунилай вилик вяз-насигьатар кIелзава, чи хуьрера, паталай хъсан алимар желб авуналди, мавлидар тешкилзава, бязи ксарихъ галаз талукь тир суьгьбетар кьиле тухузва ва диндин тарсар гузва.
Малик Агьмедов, Ахцегь ва Докъузпара районрин ОВД-дин начальник, полициядин подполковник: — Чна чун секинарзава, амма рикIел хкун лазим я: Сириядин вакъиайра чи 12 касди иштиракна. Абуруз майилвалзавайбур хуьрерани ава. Им чавай жегьилрихъ галаз профилактикадин кIвалах лазим дережада аваз тухуз тахьунин, хизандани школада тербиядин кIвалахар акIадарунин нетижа я. Сир туш хьи, школайра чи психологринни тербиячийрин пешекарвилин дережа ва кIвалах пара зайиф я. Ихьтин шартIара еке пар-жавабдарвал къайдаяр хуьдай органрин хиве гьатзава.
Али Исмаилов, райондин общественный палатадин председатель: — ЧIуру ниятрин терефдарар чаз гьинай къвезва? Гьелбетда, паталай. Чкадал гъилиз пул къведай кIвалах, яшайишдин къулай шартIар авачиз, жегьилар Москвадизни Санкт-Петербургдиз, иллаки уьлкведин Кеферпатан ва Сибирдин регионриз физва. Гьанрай бязибур чIуру фикиррал алаз хквезва. Гьавиляй заз месэладин кьилин себебрикай сад яшайишдин къулайсузвилерай аквазва. Бязибуру лугьуда хьи, гуя чи жегьилриз чилел кIвалахиз кIандач. Абурун тереф хуьн туш, зегьметди бегьер гъиз хьайитIа, кIвалахда. Шаз, бегьерлу йис яз, хъсан емишар хьана. Машмаш-къайси, муьштери авачиз, саки гадарна. Хер алай ичер кило 2-3 манатдай “сокдиз” вахкана. Исятда сортунин ичерин ящик (23-25 килограмм), жув минетчи яз, алверчийри 200-300 манатдай маса къачузва. Рекьин кирияр гана, Махачкъаладиз тухвайла, базарда ваз чка жагъизвач, алверчийрини арачийри къахкъудзава. Келемрин кьимет 1-1,5 манат я. Хипехъанвилел машгъулбуру сар, хамар гадарзава ва икI мад. Ихьтин шартIара, гьелбетда, хуьруьн майишатда кIвалахдай ашкъи къведач. Амма чIуру ниятар авай ксари жегьилар, пулар гуналди, чпин гелез желб ийизва.
Айвар Насиров, Ахцегь муниципалитетда жегьилрин Советдин председатель: — Школадин чIехи классрин аялар гъавурдик кутун патал чна шаз районда жегьилрин крарин комитетдин, образованидинни культурадин управленийрин векилрихъ галаз санал “Терроризм — угроза обществу”, “Всё о терроризме и экстремизме” темайрай суьгьбетарни викторинаяр, “Таланты Кавказа” тIвар алай фестиваль, Гъалибвилин йикъаз ва маса суварриз талукь са жерге метлеблу серенжемар кьиле тухвана. Амма жегьилри анра са артух гьяз авачиз иштиракзава. Абур активламишдай хьтин итижлу, менфятлу маса серенжемар ва рекьер жагъурна кIанда.
Тайира Муспагьова, АТВ-дин директор: — Кар ана ава хьи, тухузвай вири мярекатра (ажеб тир абур са тIвар патал туширтIа) саки гьа са жегьилри иштиракзава. Бязибуруз са затIни итижлу туш, пара жегьилар мискIинриз физва, бязибуру кIвалера ибадат ийизва. Абурукай вуж-вуж ятIа тайинариз хьун четин я. Анжах са кар якъин я: аял кьепIинамаз, дана епинамаз лугьудайвал, аял-диз лап гъвечIи чIавалай хизанда дуьз тербия гана ва гуьгъуьнайни ам гуьзчивиликай хкуд тавуна кIанда.
Дашдемир Шерифалиев