Муракаб макъамда къени, хъсан крар кьилиз акъудзавай жумарт ва масадан дердидикай хабар кьадай ксарикай чав саки гьар юкъуз хабарар агакьзава.
Вичи гьакIни мергьяматлувилин серенжемар кьиле тухузвай чи ватанэгьли, “Адалатлу Россия” партиядин векил, Махачкъала шегьердин Кирован райондин патай РД-дин Халкьдин Собранидин депутат Марат Алияровани къенин четин шартIара куьмекдин игьтияж авай ксарин гъил кьазва. Коронавирус гегьеншдиз чукIун тавунин мураддалди инсанри чпи-чеб чара авунин шартIар малумарай сифте йикъарилай эгечIна, ада эменнидалди тIимил таъмин тир хизанриз, дяведин ветеранриз ва игьтияж авай дагъустанвийриз алакьдайвал куьмекар гузва. Кьилди къачуртIа, и йикъара ада хейлин махачкъалавийриз недай-хъвадай суьрсетар пайна.
Депутатди къейд авурвал, мергьяматлувилин тедбирар, духтуррин меслятрал амал авуналди, ада Махачкъала шегьердин Кирован райондин администрациядихъ галаз санал тешкилзава. Иштиракчийри чпин арада лазим тир мензил хуьзва, чинал медицинадин махсус маскаяр, гъилерал элжекар алукIзава, антисептикрикайни менфят къачузва.
Чаз аквазвайвал, уьмуьрдин четин гьалара авай ватандашриз куьмек гунин барадай М.Алиярова халисан чешне къалурзава.
“Чун садра кьиле тухвай серенжемдал нукьтIа эцигна акъваззавач. Чна карантиндин вири муддатда игьтияж авай хизанриз чарасуз тир суьрсетрин патахъай куьмек гун кьетIнава. Вирус чукIунин хаталувал авай макъамра сада-садаз куьмек гун, духтурринни пешекаррин меслятрихъ яб акалун гзаф важиблу я”, — лугьузва депутатди.
«Лезги газет»
