Гьафтедин эвел кьилера Шамил районда авай спортдин «Спартак» лагерда ял язавай аялар зегьерламиш хьана. РД-дин здравоохраненидин министерстводин делилралди, больницадиз 86 кас аватна (абурукай 3 — лагердин къуллугъчияр, амайбур — аялар). Алай вахтунда зегьерламиш хьанвайбурун гьалар хъсан патахъ дегиш жезва. Къе-пака абур кIвалериз ахъай хъийида. И дуьшуьшдилай гуьгъуьниз Роспотребнадзорди лагерь агална. Силисдин комитетди ва прокуратуради ина ахтармишунар кьиле тухузва.
14-августдиз РД-дин Кьилин ва Гьукуматдин Администрациядин руководитель Владимир Иванова и месэладай совещание кьиле тухвана. Ана РД-дин Гьукуматдин Председателдин Сад лагьай заместитель Анатолий Къарибова, РД-дин вице-премьер-образованидинни илимдин министр Уммупазиль Омаровади, РД-дин здравоохраненидин министр Жамалудин Гьажиибрагьимова, Роспотребнадзордин РД-да авай Управленидин руководитель Элеонора Омариевади ва Шамил райондин кьил Мегьамед Гьасанова иштиракна.
Владимир Иванова къейд авурвал, Дагъустандин Кьилин везифаяр вахтуналди тамамарзавай Владимир Васильева талукь органриз арадал атанвай гьаларай тамамдиз кьил акъудунин, себебар тайинарунин тапшуругъар ганва. Ада гьакIни жавабдар ксаривай, талукь къурулушривай и месэладин жигьетдай вичел докладар агакьарун истемишна.
Владимир Иванован фикирдалди, ихьтин дуьшуьшра талукь министерствойрини ведомствойри тади гьалда серенжемар кьабулун герек я. “Спартак” лагерда арадал атай гьалариз лагьайтIа, вахтунда фикир ганач. Лагердин медперсоналдин кIвалахда, недай-хъвадай суьрсет агакьарунин ва санитариядин къайдайрал амал авунин жигьетдай кимивилер винел акъуднава.
“Исятда РД-дин прокуратуради, талукь министерствойри, ведомствойри ахтармишунар кьиле тухузва. Абурун нетижайриз килигна, кадрийрин жигьетдай серенжемар кьабулдайвал я”, — лагьана В.Иванова.
Совещанидал гьакIни лагеррин кIвалахдиз талукь регламентда дегишвилер хтуна, республикадин вири лагерра хатасузвилин серенжемар мягькемарна кIанзавайдакай лагьана.
“Аялрин сагъламвиликай ва хатасузвиликай ихтилат фидайла, къайгъусузвилин, жавабдарсузвилин гьар са дуьшуьш тахсиркарвал я. Тахсир квачирбуруз жаза гудач, тахсирлубурув жаза чарасуз агакьда. Мумкин я, тек са касдив ваъ”, — алава хъувуна В.Иванова.
Роспотребнадзорди хабар гайивал, зегьерламиш хьунин себеб сальмонеллез я. Мадни, аялар зегьерламиш хьайи суьрсет лагердиз герек тир документар галачиз агакьарзавай, кухнядани санитариядин къайдайрал амалзавачир.
«Лезги газет»
