14-августдиз Махачкъалада РД-дин Кьилин везифаяр вахтуналди тамамарзавай Владимир Васильеван регьбервилик кваз гзаф йисара эцигунар акьалтIариз тахьанвай мектебар ишлемишиз вахкуниз талукьарнавай месэлайрай совещание кьиле фена.
РикIел хкин, ихьтин объектар эцигна акьалтIарун патал республикадин Кьили РФ-дин Госдумадивай куьмек тIалабна. Нетижада федеральный бюджетдай и макьсадриз пулдин такьатар чара авунай. Гьеле виликдай хабар гайивал, 1-сентябрдиз геждалди эцигунар акьалтIариз тахьай ирид мектебди аялар кьабулда. Абур Къизилюрт, ЦIумада, Кьурагь, Сулейман-Стальский, Табасаран, Тарумовский районра ва Къизляр шегьерда ава.
Владимир Васильева совещанидал къейд авурвал, кIвалахда руководителрин кьилин везифа аялрин хатасузвал хуьн я. “ЦIаяр кьунин ва санитариядин хатасузвилиз кьетIен фикир гана кIанда. Гуьзчивал тухузвай органрин вири истемишунар кьилиз акъудун важиблу я. Гьа са вахтунда гуьзчивал тухузвай органри муниципалитетрин кьилеризни куьмек гана кIанда. Вири и гьерекатрин асул макьсад аялрин хатасузвал я”, — къейдна В.Васильева.
Республикадин Кьили Дагъустандин Халкьдин Собранидин ва муниципалитетрин депутатриз мектебриз ва аялриз куьмекуниз эвер гана.
РД-дин Кьилин ва Гьукуматдин Администрациядин руководитель Владимир Иванова муниципалитетрин кьилериз кIвалахар мукьвал тир вахтунда акьалтIарун герек тирдакай лагьана. “Гьар са объектдал кьиле тухузвай кIвалахрикай чав гьар юкъуз малуматар агакьарун лазим я”, — къейдна В.Иванова.
Чпин нубатда, районрин кьилери кIвалахар алай вацран эхирралди акьалтIардайдахъ инанмишарна.
Россиядин МЧС-дин РД-да авай Кьилин Управленидин начальник Нариман Къазимегьамедова ва Роспотребнадзордин руководитель Элеонора Омариевади гьар са объектдикай чпихъ авай делиларни раижна.
Совещанидин сергьятра аваз Хасавюрт райондин Къурушрин, Къарабудахкент райондин Гурбуки ва Новолак райондин Новомехельта хуьрер хъвадай целди таъминаруниз талукь месэлаярни веревирдна. И хуьрера ихтилат физвай месэла алай йисан эхирдалди гьялна акьалтIардайвал я.
«Лезги газет»
