Дагъустандин здравоохраненидин министерстводин пресс-къуллугъди хабар гузвайвал, пешекарри садакай масадак акатдай азаррин, сезондин гриппдин вахт алукьуникди инсанар гзаф начагъ хьунал фикир желбзава… ИкI, гриппдин вилик пад кьунин кьилин серенжемрик акатзава: мукьвал-мукьвал гъилер запундай чуьхуьн, яшайишдин кIвале ва кIвалахзавай чкада михьи гьава тун, гзаф инсанар кIватI хьанвай чкайрал фин тавун, общественный чкайра маскаяр алукIун. Пешекарри гриппдин виридалайни гзаф акатзавай штаммриз акси рапар ягъуниз эвер гузва.
Дагъустандив алай вахтунда гриппдиз акси вакцинадин еке кьадар агакьнава. ИкI, “Совигрипп” вакцина (370 агъзур доза) чIехибур патал ва “Ультрикс квадри” вакцина (300 агъзур доза) гьам чIехибур ва гьамни аялар патал ишлемишиз жезва. И кьве вакцинани фадлай ишлемишзавайбур, гегьеншдаказ ахтармишнавайбур ва чпихъ еке менфятлувал авайди тестикьарнавайбур я. Ахтармишунри къалурзавайвал, тек-туьк дуьшуьшра гьалтзавай чIуру таъсирдик (побочное действие) бедендин ифин са тIимил вахтунда хкаж ва я раб ягъай чка тIар хьун акатзава. Республикадин садакай масадак акатдай азаррин центрада (РЦИБ) чимивилин лазим къайдайрал амална хуьзвай вакцина Дагъустандин вири шегьерринни районрин поликлиникайриз, гьа и къайдаяр рекьерани чIур тавуна, агакьарзава.
— Сифтени-сифте чаз яргъалди сагъариз тежезвай азарар квай ксар сезондин гриппдикай хуьз кIанзава. Инсанри са артух кваз кьан тийизвай гриппди, эгер инсан шекердин диабетдикди, рикIинни дамаррин жуьреба-жуьре азаррикди начагъ ятIа, чIуру нетижайрал гъун, инсандин сагъламвилиз екез кьецI гун, кIевера тун мумкин я. Исятда чи республикада ахьтин агьалийриз пулсуздаказ гьам сезондин гриппдикай, гьамни ковиддикай хуьдай рапар ядай мумкинвал ава, — къейдзава РЦИБ-дин кьилин духтур Равгьаният Мирзаевади.
Къейд авун лазим я хьи, яргъалди сагъариз тежезвай азарар квай инсанрилай гъейри, азарриз акси рапар ягъунин календардал асаслу яз, садакай масадак акатдай азарриз акси рапар сифте нубатда медицинадин ва образованидин хилера зегьмет чIугвазвай ксариз яда. ГьакIни аялрин бахчайриз ва мектебриз физвай аялривайни ихьтин мумкинвиликай менфят къачуз жеда.
Рагнеда Рамалданова
