И йикъара Сингапурда кьиле фейи турнирда чи ватанэгьли кикбоксер Жабар Аскерова пешекарвилин рингдал нубатдин гъалибвал къазанмишна. Идакай «Лезги газетдиз» «ЛезгиЯр» милли порталди хабар гана.

Чешмеди кхьизвайвал, Жабарахъ галаз и сеферда бягьс чIугурди немс Энрико Кель тир. Спортсменри бягьсинин сифте декьикьайрилай эгечIна чпин зирингвал къалурзавай, амма кIвачерив ягъунин карда Аскерован алакьунар тафаватлу тирди чир жезвай.

Къизгъин женгинин нетижада судьяйри россияви спортсмендин гъалибвал малумарна. Чаз машгьур спортсмен Жаваб Аскеровахъ гележегдани анжах гъалибвилер хьана кIанзава.

«Лезги газет»