Мукьвара 31 йисан яшара авай чи ватандаш машгьур кикбоксёр Жабар Аскерова вичин бине эцигайбур ММА-дин викIегь пагьливан Сергей Харитонов, Россиядин машгьур боксёр Александр Поветкин ва карчи Эдуард Филбегер тир “Vityaz Fight” клубдихъ галаз икьрар кутIуннава.
— “Vityaz Fight” клубдин макьсад уьлкведин вилик жергейра авай спортдин макандиз элкъуьн я. Кикбоксингдай ва тайский боксдай чавай башчияр жез алакьнава, Жабар Аскерова чи клубдихъ галаз икьрар кутIунуни и кар мадни хъсандиз тестикьарзава. Гзафбуруз Жабар кикбоксингдин жанлу лишан я, чун гзаф шад я, гила чи клубда Ж.Аскеров хьунал, — лагьанва Э.Филбегера “Sportbox.ru” сайтдиз ганвай интервьюда.
Къейд авун лазим я хьи, “Vityaz Fight” клуб тешкилна тамам са йис я, ана дуьньядин 10 чемпионди чпин устадвал хкажзава.
Рагнеда Рамалданова
