Мукьвара Хивда жегьил спортсменрин арада панкратиондай Дагъустандин  ачух чемпионат кьиле фена. Ана “Горец”, “Дагфайтер”, “Чемпион” клубри, Базарганован ва Гьажи Махачеван тIва­рарихъ галай школайри, Чечнядай тир “Ахмад”  клубди,  Челябинскдай ва маса шегьеррай атанвай спортсменри, гьакI­ни Кьурагьрин хуьряй тир Гьажи Къурбанова иштиракна.

Гь.Къурбанова 61 кг-дин заланвилин категориядай 5 спортсмендихъ галаз бягьс чIугуна, ви­­чин­­­ алакьунар къалурна. Къейд авун лазим я, 2 бягьс ада вахт куьтягь жедалди гъалибвал къазанмишуналди, 1-чкадиз ва кубокдиз лайихлу хьуналди акьалтIарна. Им адан пуд лагьай­ кубок я.

Чаз малум хьайивал, Гьажиди Махачкъаладин “Чемпион” клубда тренер Эседулла Эмир­агъа­еван гъилик вердишвилер къачуз 1  йис я. И куьруь вахтунда жегьил спортсменди вичин алакьунар са шумудра къалурна. ИкI, Дагъустандин  Ог­ни шегьерда итимрин арада какахьай единоборствойрай кьиле фейи Дагъустандин чемпионатда, Дербент шегьерда Да­гъустандин кубок патал кьиле фейи акъажунра ада 1-чкаяр кьуна.

Гьажи Къурбановахъ  школада кIелзавай вахтундани спортдин рекьяй  хъсан нетижаяр хьайиди я. Ада азаддаказ кьуршахар кьунай районда, гьакI Дагъустанда кьиле фейи акъажунрани кIвен­кIвечи чкаяр кьунай.

2015-йисуз Гьажиди Кьурагьрин 1-нумрадин юкьван школа хъсан къиметар аваз  акьалтIарна ва алай вахтунда  вичин чирвилерин рехъ Дербентдин социально-педагогвилин  институтда давамарзава.

Чна умудзава,  Гьажидихъ Дагъустандилай, Россиядилай къецени еке агалкьунар  жеда.

Рагнеда Рамалданова