Мегьарамдхуьруьн райондин КьепIир-Къазмайрин хуьруьн юкьван мектебда кIелзавай Зейнаб Аюбова телевиденидин виридалайни машгьур “Умники и умницы” олимпиададин ярумчух (полуфинал) финалдиз акъатнава. Идакай “Лезги газетдиз” муниципалитетдин администрациядин пресс-къуллугъди хабар гана.

Алай йисан 2-6 декабрдиз региондин олимпиададин финалдиз акъатайбур Сад лагьай каналдай гузвай “Умники и умницы” передачада иштиракун патал Москвадиз фена. Зейнаб Аюбовадихъ галаз санал уьлкведин меркездиз мад Дербент шегьердин 11-нумрадин юкьван мектебдин ученик Миртагьи Сеидов ва Ногъай райондин Ортатюбе хуьруьн юкьван мектебдин ученица Индира Янакаевани рекье гьатна. Вичин чирвилералди, зигьиндалди камаллу лезги руша кьве орден къазанмишна ва ам ярумчух финалдиз акъатна.

Москвада Дагъустандай фенвай аялар РФ-дин Президентдин патав гвай Дагъустандин Векилханадин регьбердин везифаяр вахтуналди тамамарзавай Гьамзат Гьамзатова ва “Содружество” фондунин директор Эльвира Аминовади кьабулна. Абуру Зейнабахъ мадни еке агалкьунар хьун алхишна.

Алай вахтунда Зейнаб Аюбова школьникрин арада федеральный дережадаваз кьиле тухузвай телевиденидин “Умники и умницы” олимпиададин нубатдин этапдиз гьазур жезва. Чна чи бажарагълу руш гъалиб жедайдак умуд кутазва.

«Лезги газет»