Чи ватанэгьлияр – гьар сана
Гзаф вахтара бязи инсанрин сиверай ихьтин гафарин ванерни галукьда: “Гилан жегьилриз я кIелиз кIанзавач, я зегьмет чIугваз”. Эгер чун дувулриз килигайтIа, гьакъикъат ахьтинди туш: жегьилри кIелни ийизва, зегьметни чIугвазва. Ахьтин келимаяр зегьметдикай кьил къакъудзавай са бязи куьчебасанар акурла, фикирдиз къвезвайбур я.
Алай вахтунда хуьрерин мектебар лап хъсандиз куьтягьай, кIвалерани дуьз тербия ганвай вишералди жегьилри Россиядин вузра чирвилер къачузва, агалкьунралди акьалтIарайдалай кьулухъ гьукуматдин карханайра жавабдар къуллугъчияр яз зегьметни чIугвазва. Гьахьтинбурукай садни халисан зегьметчи хизандай акъатнавай къурушви Мамедов Самир Ризванович я.
Ам 1996-йисан 5-апрелдиз зегьметчи хизанда дидедиз хьана. 2013-йисуз Къурушрин хуьруьн 1-нумрадин юкьван мектеб тафаватлудаказ куьтягьай Самир Мамедов Новочеркасскда авай гьукуматдин Южно-Российский политехнический университетдин “Котлы и реакторы строения” факультетдик экечIна. КIелунрал рикI алай жегьилди вири патарихъай вичин алакьунар къалурна, чешнелу студентни хьана. Гьа са вахтунда Самира заочнидаказ “Горные машины и оборудования” факультетдани кIелна.
2017-йисуз ам “Тепловые электростанции и тепломеханика” пешедай магистратурадиз гьахьна ва 2019-йисуз гьа пешедай магистрдин тIварни къачуна. Самира кIелдай йисара университетдин военный кафедрани куьтягьна ва запасда авай лейтенантвилин тIвар къачуна. Ам гьа къачунвай чирвилерал сергьят эцигна акъвазнач, 2019-йисуз Саранск шегьерда авай Н.П.Огареван тIварунихъ галай Мордовиядин гьукуматдин университетдин аспирантурадиз гьахьна ва алай вахтунда “Строительные материалы и изделия” темадай диссертациядин винел кIвалахзава.
Алай вахтунда Самир Ризвановича Новочеркасскдин ГРЭС-да ругуд лагьай дережадин разряд авай инженер яз “Машинист-обходчик котельного оборудования” къуллугъдал зегьмет чIугвазва. Им лап жавабдар кIвалах я, Самир кьве блокдин ва “ТПП-100” жуьредин котелдин кIвалахрин патахъай жаваб гузвай пешекар я. Адан кIва-лахдин тарифдин ва жавабдарвилин патахъай ГРЭС-дин директорди ганвай характеристикадини шагьидвалзава.
Ватандиз, жемиятдиз, хайи диде-бубайриз вафалу, руьгьдал кIеви рухваярни рушар гьикьван аватIани, къуй абурун дережаяр мадни цавун аршдиз хкаж хьурай.
Гьажи Къазиев