РД-дин Муфтиятдин мергьяматлувилин “Инсан” фондунин Ахцегь районда авай филиалдин кьиле 2020-йисан 15-майдилай Умар Исламов тайинарнава. ТIегъуьндихъ галаз алакъалу яз арадал атанвай четин шартIара фондуни республикада мергьяматлувилин чIехи серенжемар кьиле тухузва, игьтияж авайбуруз куьмекдин гъил яргъи ийизва. Ихьтин крарал машгъул жезвай ксарин гьакъиндай жемятдини разивал къалурзава.
Мисал яз, мукьвара Ахцегь райондин “ЦIийи дуьнья” газетдин редакциядиз Хинерин дередин агьалийрин мецелай Умар Исламовазни адан дустариз сагърай лугьузвай ва адаз цIийи къуллугъ мубаракзавай чар атана:
“Гьуьрметлу Умар стха! 2017-йисан гатуз вуна, хсуси такьатар ва мукьва-кьилиярни ярар-дустар желбна, дагълух Гутумрин, Фиярин ва Хинерин хуьрерин ва абурукай хкатнавай кьилдин майишатрин агьалияр интернетдин дурумлу алакъадалди таъминарун патал Ериш дагъдин инсандин кIвач хкIун тавунвай кукIвал автономный махсус станция эцигна. И кардай куьн ва вертолётдин куьмекдалди дагъдин кукIвал интернетдин антеннани герек тадаракар тухвай ахцегьви жегьилар пара кьадар сагърай! И мукьвара ви иштираквал аваз “Инсан” фондуни Ахцегь райондин больницадиз дарманрин, дарда авай бязи хизанриз недай суьрсетдин куьмекар гана. Гьелбетда, инсанпересвилин, сувабдин и крар халкьдин рикIелай садрани алатдач. Инсан, гьакъикъатдани, четин макъамда чир жеда. Хсуси нефс хвена, четин чIавуз инсанриз мергьяматлувилин куьмекар ийиз гьазур ватанперес, кьегьал рухвайрин игьтияж къе халкьди кьетIендиз гьиссзава. Аллагьдиз шукур хьуй, чаз куьн хьтин жегьилар ава. Куь куьмекдалди “Инсан” фондуни Ахцегь райондихъ галаз гележегдани сих алакъа хуьдайдак чна умуд кутазва…”.
Эхь, халкьдин тариф-къиметдин и хуш келимайрилай кьулухъ чи жегьилрал дамахунин гьиссер мадни артух хьана. Умар хьтин камаллу хва тербияламишнавай диде-бубадизни муаллимриз баркалла!
Къейд ийин, дагъдин шартIара хъсан йигинвал авай интернет кардик кутун патал Умар Исламова, заказчик-пудратчини вич яз, 1 миллионни 600 агъзур манатдин кьадарда аваз хсуси такьатар харжна. Нетижада алай вахтунда пуд хуьруьн 60 кIвале дурумлу интернет ава ва 200-далай артух мобильный телефонрик интернетдин сигнал ква. Гьакъикъатда, гьа и кар себеб яз, карантиндин четин шартIара Гутумрин, Фиярин ва Хинерин школайрин аялривай онлайн къайдада 2019-2020-кIелунин йисни акьалтIариз хьана.
“Дугъри я, алай вахтунда чаз интернетдикай менфят къачунай абонентри гузвай гьакъидикай хийир ава ва гьамни, асул гьисабдай, дежурство тухузвай кьве касдин мажибдиз ва чи станция къайдадик кваз хуьнин крариз ахкъатзава. Зи къаст-макьсад и кардал пул къазанмишун туш, дагълух хуьрерин жемят интернетдин алакъадалди таъминарун (жуван ери-бине Хиняй яз, заз ана яшайишдин жигьетдай гьихьтин четинвилер аватIа чизва), дагъвияр алай девирдин цивилизациядиз шерик авун, хуьруьн жегьилриз яшайишдин са бубат шартIар хьайитIани яратмишун я. Эгер жемят залай рази ятIа, залай и кар алакьзава ва зун шад я”, — кIусни дамах гвачиз лугьузва Умара.
Чи Мурадни рикIе экуь къастар авай Умарахъ мадни еке агалкьунар хьун я.
Дашдемир Шерифалиев
