Чи ватанэгьлияр — гьар сана

Къанни ирид йисан яшда авай жегьил алим Феликс Агьмедова Моск­вада кардик квай Г.В. Плеханован тIвар­цIихъ галай Россиядин экономикадин универ­ситетда тарсар гузва. ФЛНКА-дин векил­­ри чаз хабар гайивал, и йикъара ада «Развитие инфраструктуры рынка труда­ под влиянием институционально-экономических факторов» темадай экономикадин илимрин кандидатвилин диссертация агалкьунралди хвена. Диссертацийрин советдин председателвилин вез­ифаяр чи ватанэгьли, экономикадин илимрин доктор, профессор Асали Асалиева кьилиз акъудна.

Ф. Агьмедов 1996-йисан 28-октябр­диз Москвада дидедиз хьана. Адан ери-би­не Докъузпара райондин Мискискарин­ хуьряй я. «Зун жуван мукьва-кьилияр авай Мискискарин ва Ярагъ-Къазмайрин хуьрериз саки гьар йисуз хъфизва. Хайи лезги чIал заз акьван хъсандиз чизвач, и нукьсан арадай акъудун патални зун алахъзава. Къецепатан чIалар чирунал машгъул хьана зун. Кьилди къачуртIа, ингилис чIал чизва, гила зун испан чIал чирунал машгъул я», — лугьузва Феликс Агьмедова.

Алимрин советдик квайбуру, Феликс Агьмедова хкянавай тема важиблуди тирди къейдунихъ галаз сад хьиз, илимдин кIвалахдиз вини дережадин къимет гана. Илимдал машгъул жегьилди Россиядин зегьметдин базардин къурулушдин ва и хел рекъемламишунин месэлайриз талукь яз кхьенвай макъалаяр илимдин изданийриз икьван чIавалдини акъат­на. Адахъ маса авторрихъ галаз санал ингилис чIалал кхьенвай илимдин кIвалахарни ава.

Кьилин образование авай ассистент яз, ада бакалавриатдин студентриз менеджментдай, карханадин работникар, туриствилин тешкилатар идара авунай тарсар гузва, специалитетда — экономикадин хатасузвиляй.

Жегьил алимди гележегда бизнесдални машгъул хьун мумкин яз гьисабзава, гьа са вахтунда илимдин деринриз мадни гзаф «сиягьатиз» кIанзава. «Образованидин, чирвилер гунин рекьяй университетдихъ тайин истемишунар ава. И кардиз тамамдиз гьахьун герек я, гьа са вахтунда илимни бизнес сад-садав кьурвал ийиз хьун мумкин я», — лагьана ада.

Машгьур алим, Г.В. Плеханован тIвар­цIихъ галай РЭУ-дин яшайишдинни экономикадин проектрин центрадин директор Асали Асалиеван фикирдалди, Феликс Агьмедов еке гележег авай, зегьмет кIани жегьил илимдар я. «Ассистентдин дережада аватIани, Феликсахъ профессоррин, кафедрадин муаллимрин арада гьуьрмет ава. Ада неинки урус, гьакI ингилис чIалални студентриз тарсар гузва», — лугьузва А.Асалиева.

Феликс Агьмедов чаз пешедин, илимдин рекье кукIушрихъ агакьна кIан­зава.

«Лезги газет»