Шак физвайди кьуна
Махачкъаладин полициядиз ракIарар маса гузвай туьквендин иесийрилай арза атана. Арзачийрин гафаралди, алай йисан майдилай августдалди малум тушир касди абурун 1 миллионни 700 агъзур манат пул чуьнуьхна. Идакай РД-дин МВД-дин пресс-къуллугъди хабар гузва.
МВД-дин уголовный розыскдин управленидин къуллугъчийри тадиз кьабулай серенжемрин нетижада шак физвай руш кьунва. Ада вичи авур кар хиве кьуна. 27 йисан яшда авай руша ихтилат авурвал, метягь маса гунин менеджер яз кIвалахзаваз, ада вичин ихтиярда авай мумкинвиликай менфят къачуна. Вичиз пул «туькIуьрун» патал ада ихьтин фенд акъудна: терминал къайдадик квач лугьуз, ада муьштерияр чIалахъарна ва метягь маса къачурбуруз гьакъи вичин картадиз ракъурун теклифна. Ганвай метягьдин гьакъиндай ада тапан чекарни акъудна. «Къазанмишай» такьатар ада вичин хсуси игьтияжриз харжна.
И делилдай ахтармишунар давам жезва.
«ЛГ»
