И йикъара РФ-дин Президент Владимир Путина дипломат Азим Ярагьмедов Замбияда Россиядин Чрезвычайный ва Полномочный векил яз тайинарна. Идан гьакъиндай Указ официальный интернет-порталда ава.
Къейд ийин хьи, Азим Ярагьмедов дипломатвилин ихьтин чIехи къуллугъдал тайинарнавай сад лагьай дагъустанви я. Ам Кьасумхуьрелай я. Чаз малум тирвал, Ярагьмедова 2011-2015-йисара Россиядин МИД-да РФ-дин субъектрихъ, парламентрихъ ва общественный объединенийрихъ галаз алакъа хуьдай Департаментдин директорвилин везифаяр тамамарна. Са шумуд йисуз Эритреяда, Африкадин Кефердинни РагъэкъечIдай пата авай, Судандихъ, Эфиопиядихъ, Джибутидихъ галаз сергьятламиш жезвай гъвечIи уьлкведа Россиядин Чрезвычайный ва Полномочный векил яз къуллугъна. Эритреяда посолвиле тайинардалди вилик ада РФ-дин къецепатан крарин министерствода, Тажикистанда Генеральный консулвиле кIвалахна.
Азим Ярагьмедован кьетIен зегьмет государстводин хейлин шабагьралди къейднава. Адахъ Дагъустан Республикадин Верховный Советдин Гьуьрметдин грамота, “Россиядин флотдин 300 йис”, “Россиядин МИД-дин 200 йис”, “Россиядин МИД-дин Консулвилин къуллугъдин 200 йис” медалар, “Тажикистанда къуллугъ авунай” Россиядин ФСБ-дин знак, Россиядин Федерациядин Президентдин Гьуьрметдин грамота, “Ватандин вилик лайихлувилерай” II дережадин ордендин медаль, “Россиядин Федерациядин къецепатан сиясатдин курс уьмуьрдиз кечирмишуник чIехи пай кутунай ва гьакъисагъ зегьметдай” медаль ава. 2020-йисуз Россиядин Президентди адаз дипломатиядин лап вини дережадин армиядин генералдин чин гана. Ихьтин дережа РФ-дин къецепатан крарин министр Сергей Лавроваз, адан заместителриз ва са бязи посолриз ава.
Къейд ийин хьи, СтIал Сулейманан райондин администрациядин кьил Нариман Абдулмуталибова вири районэгьлийрин патай Азим Ярагьмедоваз цIийи къуллугъ мубаракна. “Зи ва чи райондин агьалийрин патай Азим Ярагьмедоваз Замбияда РФ-дин Чрезвычайный ва Полномочный посолвилин къуллугъдал тайинарун рикIин сидкьидай тебрикзава. Кьвед лагьай сеферда ихьтин чIехи къуллугъдал эцигуни чи уьлкведин руководстводи адаз ийизвай зурба ихтибарвилин гьакъиндай шагьидвалзава. Инанмиш я хьи, ада вичел тапшурмишнавай кьетIен ва важиблу везифаяр баркаллувилелди кьилиз акъудда. Азим Алаудиновичахъ кIвалахдин еке тежриба ава. Чна жуван ватанэгьлидин агалкьунрал дамахзава. Ада вичиз авунвай чIехи ихтибар кьилиз акъудда, уьлкведин къецепатан политика менфятлуди хьун патал вири къуватар эцигда. КIвалахда мадни виниз тир агалкьунар хьурай вахъ!” — лагьанва Н.Абдулмуталибован тебрикда.
«Лезги газет»
