18-майдиз Махачкъалада республикада кардик квай коронавирусдин вилик пад кьунин рекьяй Оперштабдин нубатдин заседание кьиле фена. Мярекат гатIундайла, РД-дин Кьилин везифаяр вахтуналди тамамарзавай Сергей Меликова къейд авурвал, тIугъвалдихъ галаз алакъалу месэлаяр исятдани уьлкведин руководстводин кьетIен гуьзчивилик ква.
Региондин Кьилин фикирдалди, тIегъуьндин винел гъалибвал къачудай рекьерикай сад адаз акси рапар ягъун я. Амма и кар республикада зайиф еришралди вилик физва. 17-майдин делилралди, 78 агъзур касди рапар янава, вакцинадин Дагъустандиз чара авунвай дозайрин кьадар лагьайтIа, 100 агъзурдалай алатнава. Сергей Меликова хабар гайивал, са кьадар районра вакцина ишлемиш тийиз амукьзава, бязи районра лагьайтIа, бес жезвач. И кар фикирда кьуна, ада здравоохраненидин министерстводиз коронавирусдиз акси рапар муниципалитетрин арада паюнин кIвалах къайдадик кутунин тапшуругъ гана.
Лагьана кIанда, алай вахтунда Дагъустанда йикъан къене коронавирус акатзавайбурун кьадар юкьван гьисабдалди 42-дав агакьзава. Санлай къачурла ва са жерге маса регионрив гекъигайла, им пис рекъем туш. Амма тIегъуьндин вилик пад кьун патал кьиле тухузвай серенжемар зайифарна виже къведач.
Заседанидин сергьятра аваз РД-дин здравоохраненидин министр Татьяна Беляевади хабар гайивал, 5 йикъан къене республикадив “ЭпиВакКорона” препаратдин — 2430, “КовиВак” — 1560 ва “Спутник V” — 84000 доза агакьдайвал я.
РД-да авай Роспотребнадзордин Управленидин кьил Николай Павлован делилралди, коронавирус акатзавайбурун кьадар, санлай къачурла, 12 муниципалитетда гзаф жезва. Абурун арада Каспийск, Избербаш, Хасавюрт шегьерар, Ботлих, Сергокъала, Казбек, Хунзах ва маса районар ава. Гьа са вахтунда 17 районда коронавирус квай са азарлудини авач.
Заседанидал са жерге месэлайрихъ галаз санал шадвилин мярекатрин залрин кIвалах кардик кухтунин месэлани веревирдна. Дагъустандин мехъеррин индустриядин Ассоциациядин президент Ханум Аджиевадин гафаралди, залар агалун себеб яз, абурун сагьибрин карчивилиз еке зарар жезва. Сергей Меликован гафаралди, виликдай кьве сеферда залрин кIвалах кардик кухтадай къарар кьабулнай, амма вири залри Роспотребнадзордин истемишунрал амалнач. Эгер амал ийиз хьайитIа, залар ахъайдай мумкинвал ава. И месэла гьялун патал региондин Кьили республикадин бизнес-омбудсмен Мурад Далгатовал мярекатар тухудай залрин сагьибрихъ галаз гуьруьш тухун тапшурмишна.
Заседанидин кIвалахдикай гегьеншдиз РД-дин Кьилин официальный сайтдай кIелиз жеда.
«Лезги газет»
