Ватандал бедбахтвал атайла, гьар са кьегьалдин буржи ам душмандикай, гъиле яракь кьуна хуьн я. Ингье нубатдин сеферда зун столдихъ ацукьнава, жегьил чIавара кIватIай архивдай-хазинадай са-са чар къачуз, кIелиз… Вахтунив кьадай чарар са патахъ ийизвайла, зи гъиле чIехи гьарфаралди кхьенвай «Саламдин чарчяй» акъуднавай кьве табагъ гьатна.
«Салам, играми юлдаш Чирагъхалум! Зун ва чи батальон вири, Сталинграддин военно-политический школа куьтягьдалди, и шегьердиз душманри-фашистри къурху гуз акуна, акъудна, передовой линиядиз рекье тунва. Зунни, захъ галаз Мусаибни (Стальский) са частуна ава. Чна ина кьиле физвай женгерикай ва чи аскерри къазанмишзавай агалкьунрикай чарар кхьиз, хабарар агакьарда. Чна хайи хуьрер, ярар-дустар рикIел хкиз ихтилатарзава. Чун кьведни политрукар я. Чи частара маса частарай кутун хъувунвай жегьил комсомоларни ава. Чна, коммунистри, комсомолри ва амай красноармейцийри душмандиз инсаф ийизвач. Гьаниз килигна, зун умудлу я, чи гъалибвилин югъ яргъал алач. Чун душман вичин магъарада кукIварна, хкведа.
Аялриз дарвал гумир гьа, Чирагъхалум! Чаз, чи фронтдиз куьмекар гун рикIелай алудмир. Саламар я квез вирибуруз…»
Гуьгъуьнин цIарара чар кхьейда, гьич садни рикIелай ракъур тавуна, вири мукьвабуруз саламар рекье твазва, къалабулухдин гъиляй чпихъ тайин адресар авачирдини лугьузва. Эхирдай алава хъийизва: «Вахт авач, гьа инал за куьтягьна. Де куьн сагърай! Ви Мегьамеднеби. 17.08.1942-йис. Сталинграддин фронт».
Мегьамеднеби халу заз мукьувай, Буйнакскда хуьруьн майишатдин техникум акьалтIарна, «Сельхозтехника» идарадиз хтайла, чир хьанай. Ватандин ЧIехи дяведин йисара ада Мусаиб Стальскийдихъ галаз Сталинграддин къати женгера иштиракайдакай заз хабар авачир, гьавиляй жузунарни авуначир. Са тIимил вахтунилай Мегьамеднеби халу пенсиядиз экъечIнай. Адан уьмуьрдин юлдаш Чирагъхалум, вири мукьвабурни акахьна чидайвиляй, за гуьгъуьнлай адаз уьмуьрдин юлдашди Сталинграддин фронтдай рахкурай чарчин копия авунай…
Рагьмет хьуй Мегьамеднеби халудизни, ада хьиз, гъиле яракь кьуна, душмандин хура акъвазай вирибурузни. Чна шаир СтIал Мусаибан 110 йисан юбилей къейддайла, гьелбетда, рикIел адан женгинин юлдашарни хквезва. Заз жуван фикирар шаирдиз бахшнавай цIараралди акьалтIариз кIанзава.
Бедбахтвилин хъен атайла Ватандал,
Хци къелем элкъуьрнай на жидадиз.
Кьин кьунай на ви истеклу виждандал,
Цуьквед багъдик тадач лугьуз ктадиз.
Шаирдин хва, халис шаир, коммунист,
Азад хьанвай дагъви халкьдин векил тир.
Бажарагълу инсан тир гьар камуниз,
Вун а чІавуз цуькведавай жегьил тир.
ЦІийи свасни, рикІ алай руш, дидени
КІвале туна, рекье гьатнай женгиниз.
Гьич садазни мегер кьарай къведани?
Ялавлу рикІ кузвай чІавуз куькІуьниз!
Намусдивай эхиз хьанач хажалат,
Элкъуьрун чи азад зегьмет дяведиз.
Волга вацІа нече шумуд са жаллатІ
Ви взводи рекье тунай дегьнедиз!
Бубадиз хьиз, лукІвал такІан акуна,
Вун ажалдин хуруз фенай уьтквемдиз!
Сталинград паталди женгина
Вун, Мусаиб, акъвазнай лап мягькемдиз!
Гьайиф хьи, куьн хьтинбур а женгера
Гзаф телеф хьанай гъалибвал патал.
Куь гьар са тІвар хуьда чна рикІера
Чи несилриз ядигар яз тун патал!
Душмандиз кІур гана вичин меркезда!
Амма чахъ ви хажалатдин пар ама!
Волгограддин Пантеонда эвездай,
Уьмуьрлух яз, ви баркаллу тІвар ама!
Сажидин Саидгьасанов,
Дагъустандин халкьдин шаир
