СтIал Сулейманан районда, Яшлубурун международный йикъан сергьятра аваз, «Знак внимания» лишандик кваз серенжем кьиле тухвана. Райадминистрациядин пресс-къуллугъди хабар гузвайвал, КЦСОН-дин (директор — Абдулфетягь Бабаев) къуллугъчийри, райондин прокурордин куьмекчи Амиран Мукаиловахъ галаз санал яшлубурун кIвалериз физ, абурун гуьгьуьл къачуна.
Серенжемдин тешкилатчийри, мугьмандиз фидайла, тухун адет хьанвай продуктрихъ ва ширинлухрихъ галаз санал, яшлу ксариз пулдин пишкешарни гана. Гуьруьшдин вахтунда абуру серенжемдин макьсаддикай суьгьбетна, къайгъударвал чIугун хьиз, куьмек гузни гьазур тирди раижна. Яшлубурухъ авай четин месэлаяр чирна, абурун суалриз жавабар гана.
«Ихьтин серенжемри несилрин арада алакъаяр мягькемариз куьмекзава, гьукуматди, районди яшлубурун къайгъударвал авун чи хиве авай жавабдар везифайрин пай тирди къалурзава», — къейдзава серенжем тешкилай ксари.
Дугъриданни, яшлу кас кIвалин абур, куьлег я. ЧIехи яшарин инсанрин уьмуьрдин тежриба, зегьметда абуру къазанмишнавай агалкьунар — чун патал чешнени. Чи диде-бубайрилай чав агакьай тербияни гьахьтинди я. Къенин юкъуз чнани чи аялриз и жуьреда тарс гана кIанда. Гьаниз килигна, яшлубурун патахъай къайгъударвал авун чи гьар садан гьар йикъан буржи я. Абуру ялгъузвал гьисс тавун, къарши яз, къайгъударвал ва чимивал гьисс авун патал чна алакьдай вири жуьредин куьмекар гун важиблу месэлайрик акатзава.
Россиядин Яшайишдин фондунин Дагъустандин отделенидин малуматдалди, къенин юкъуз Дагъларин уьлкведа чпин яшар 100-дав агакьнавай ва адалай виниз алатнавай 101 кас ава. Абурукай 91 дишегьлияр я, 10 — итимар. Яшлубурукай 73 кас хуьрера яшамиш жезва, 28 кас — шегьерра. Виридалайни яшлу дишегьли Махачкъалада яшамиш жезва, алай йисан июлдиз адан 115 йис тамам хьана.
РикIел хкин, Россияда Яшлубурун югъ 1992-йисуз тайинарнай.
Регина Семедова
