Мегьарамдхуьруьн райондин Ярагърин хуьр — Дагъустандин имамрин муаллим, Кавказдин дяведин диндин регьбер Мегьамед Ярагъидин ватан. Чкадин агьалийри республикадин властривай ина алай аямдин медениятдин центр эцигун тIалабиз гзаф йисар я.
Машгьур хуьр, абурун фикирдалди, медениятдин мярекатар кьиле тухудай ва рикI аладардай туькIвей идара хьуниз фадлай лайихлу я. Дагъустандин культурадин министерстводиз рекье тунвай Чарче абуру кхьизва: “Хуьре садрани культурадин халис кIвал хьайиди туш. Ина экв ават тийизвай са мертебадин ва рикI аладарун патал гьич са жуьрединни къулайвилер авачир тевледиз ухшар чкадиз къенин юкъуз клуб лугьузва”.
15-майдиз республикадин культурадин министр Зарема Бутаевади и месэладин патахъай журналист Аликбер Абдулгьамидоваз гайи жавабдин чарче кхьенва: “Дагъустан республикадин министерство, Мегьарамдхуьруьн администрацияди лазим тир вири документар агакьарайтIа, тIвар кьунвай объект “Ярагъдал (Ярагъ-Къазмайрал) культурадин кIвал” эцигун патал ам Россиядин Федерациядин “Культура ва туризм вилик тухун” ва Дагъустан Республикадин “Дагъустан Республикада культура вилик тухун” госпрограммайрик кутадай мумкинвал жагъуриз гьазур я”.
Министерстводин векилрин гафаралди, райондин кьиле авай ксари тади гьалда лазим документар гьазурайтIа, культурадин цIийи кIвал 2023-йис патал “Дагъустан Республикада культура вилик тухун” госпрограммадик кутадайвал я.
Чи мухбир
